24.02.2021

Wenig Plattdüütsch

Veer wetenschaftliche Opsätz druckt dat "Niederdeutsche Wort" in sien 60. Johrgang af. Veel geiht dat üm Methoden, wenn een Spraakdaten sammelt: "Die Erhebung der regionalsprachlichen Syntax des Deutschen: horizontal, indirekt, vertikal und online", "Der Laie als Experte. Mit wem haben wir es in der Wahrnehmungsdialektologie eigentlich zu tun?" un "Ist der Explorator ein Störfaktor? Zu den methodischen Grenzen festgeschriebener Aufnahmedesigns". Wo överhaupt en beten Plattdüütsch binnen stickt, dat is en Bidrag över dat Projekt "Dialektatlas Mittleres Westdeutschland".

Vun dat fröhere "Niederdeutsche Wort" is nich mehr veel nableven. Johrteihntelang stünnen Bidrääg över de middelnedderdüütsche Spraak bavenan. Nu geiht dat üm allens dat, wat een an Varietäten twüschen Standard un Dialekt finnen kann. Wat opfallt: Wenn hier vun "Regionalspraak" snackt warrt, denn geiht dat nich üm dat staatspolitische Woort, as dat in de Sprakencharta fastleggt is. Nee, hier meent se in de Marborger Traditschoon de Ümgangsspraak in de Region. Un to de "Dialekten" höört hier ok Plattdüütsch mit dorto. Warrt allerhööchste Tiet, dat sik Wetenschaftlers to de Charta-Regionalspraak bekennt.

De Inhalt wiest den Kurs, den de Spraakwetenschaft opstunns in Düütschland stüert: Mit veel Nadenken över de Theorie.

 

Niederdeutsches Wort. Beiträge zur niederdeutschen Philologie 60 (2020). Aschendorff : Münster 2020, 155 S.

ISSN 0078-0545