09.09.2020

Vun em un ehr wat op de Ohren

16 Vertellen to’n Toluustern sünd op düsse CD op. In 3 bet 5 Minuten kriegt Martina un Timo Brünjes en ganze Reeg Kanten vun uns Alldagsleven mit all de lütten Maleschen faat. Dor sünd Nadenk-Geschichten mit bi un ok Belevens-Geschichten. Familie, Naverslüüd, Beerdigung, un veel vun sik sülvst – beid Anfang 40, de mit beide Been midden in’t Leven staht. In Corona-Tieden is dat villicht en Bidrag över den een mal nadenken schull: Bo di dien egen Johrmarkt in dien Goorn op.

Martina un Timo Brünjes sünd in Gannerseer to Huus. Se is en Aktivposten bi de Nedderdüütsche Bühn in Delmhorst, dor hett se ok dat Leit für de Jugendgrupp. Se översett Theaterstücken un höört to de Plattdüütsche-Narichten-Kru bi Radio Bremen to. He verdeent sien Geld as Chemie- un Labortechniker. 2018 hebbt de beiden al dat Book „Schatz ik will nich in Urlaub or worum Deko slecht is för de Ehe“ rutbröcht.

An’t Enn vun de CD sünd Stücken sammelt, bi de bi’t Lesen wat scheeflopen is – ja, hett sik wat op Platt mit a un o un dat å dortwüschen.

 

Timo un Martina Brünjes: Lusterbook. Needet ut de Geschichtenschmiede Bürstel. Isensee : Oldenburg 2019. 67:42 Min.

ISBN: 978-3-7308-1596-0