03.08.2017

Ut Luther sien Tiet

In de Johren 1528 bet 1530 loopt wi mit Abt Liborius mit. He harr dat Leit vun dat Kloster Hude. De Karkenmann harr dicht bi in Bremen vun Luther höört un sik to den Reformator bekennt. Man dat kunn de Herrschaften ut Mönster, de op de Borg in Demost dat Seggen harrn, nich gefallen.

De unrustige Reformationstiet bemött uns hier as Regionalgeschicht. Macht, Gloven, Weltordnung – allens dat speelt jüst so en Rull as dat Leven vun de Lüüd in’t Kloster un in de Hööv ümto. De Autor nimmt allens, wat in de Böker un Archiven över dat Kloster to finnen is. He gifft de Figuren en Gesicht un en Seelen- un Geföhlsleven. An’t Enn steiht en lebennig Vertellen, dat sik so oder in de Oort ok annerwegens in Noorddüütschland harr afspelen kunnt.

Dat is al dat drüdde Book vun Hartwig Ohlenbusch, de sik as Heimatforscher versteiht. 2000 harr de Mann, de in Neenborg in Friesland to Huus is, en Vertellen över de Hexentieden schreven. Un nu maakt he dat Finster op na en Tiet, de akkerat 500 Johr trüchliggt un vun de wi veel to wenig afweet.

Hartwig Ohlenbusch: „De nee bremsche Ungloben“. Globensstriet in de Tiet van de Reformatschoon. Isensee : Oldenburg 2017, 108 S.

ISBN 978-3-7308-1351-5

« Zurück