27.08.2020

Platt för Brannenborger Grundscholen

In teihn Lexen geiht dat mit Max un Klara dör de Welt vun Grundschoolkinner: Vun ”Dat bün ik” över ”Äten un Drinken” bet hen na ”Unnerwägens”. Allens op grote Sieden mit klore Grafik un matte Klören. Dor gifft dat en Barg Mööglichkeiten, in de Klass in’t Snacken to kamen, över de Biller, över de Figuren oder över de egen Gedanken un Geföhlen. Wenn dat för de 1. oder 2. Klass ween schall, denn is dor af un an woll en beten to veel Leestext bi. Wenn en Woort na de Gegend anners utsnackt warrt, denn is dat an de blaue Schrift to kennen. An’t Enn staht en Textsammlung, en beten Grammatik un en Wöörlist.

Dat is mal en Opslag! Hier wullen sik en poor Lüüd nich dormit affinnen, dat dta mit de plattdüütsche Spraak in Brannenborg bargdaal geiht. Un so hebbt se de Saak in de Hand nahmen: dree Froenslüüd vun den “Verein für Niederdeutsch im Land Brandenburg”. Un se hebbt dat sogoor henkregen, dat dat Land Geld för den Druck geven hett. Hett eben ok allens wat mit de Sprakencharta to doon.

Bi’t Schrieven gaht de Brannenborgers jümehr egen Weg. Man dat is en Punkt, op den dat hier nich so ankummt. Dorför gifft dat in den Plattfibel-Fanshop T-Shirts un Büdel to bestellen. Ok hier gellt: Doon is en Ding!

 

Elisabeth Berner, Astrid Flügge, Doris Meinke: Uns erst Brannenborch Plattfibel. Hrsg. vom Verein für Niederdeutsch im Land Brandenburg e. V. Schibri Verlag : Milow 2020, 118 S.

ISBN: 978-3-86863-203-3