02.09.2020

Moord un Doodslag

Dat is de eerste Band vun en ne'e Krimi-Reeg to’n Lesen un Smuustern. 25 lütte Vertellen üm jüst so vele Oorten, een Mitminsch (oder mehr) vun düsse Welt to bringen. Mit de Hannen, mit en Metz, Gift oder en Scheetiesen. Jichenswat drifft so’n Mörder an, un de Autorin weet: „Keerls un Frons stoht sik in Abnormitäten un Mordsgedanken nix no.“

Anneliese Hamann schrifft al mehr as 20 Johr för’t Blatt in Verden un umto. Se hett en Moordspaaß an’t Vertellen. Man bi de plattdüütschen Wöör, Spraakbiller un den Satzboo grippt se faken in de hoochdüütsche Kist rin. Un meisttiets is dor gor keen Noot…

Jüst in’n August is dat Book ok op Hooch rutkamen – blots mit „und“ in den Titel.

 

Mordswut un Rachegelüste. Plattdütsche Krimi-Geschichten. Edition Falkenberg : Bremen 2019, 124 S.

ISBN: 978-3-95494-196-4