29.10.2020

An de Grenz

In’n April 2019 hebbt sik de beiden Literaturgesellschaften, de sik üm dat Wark vun Fritz Reuter un Johannes Gillhoff kümmert, in Ratzborg to jümehr Dagfohrt drapen. As Achtergrund kriegt wi wat vun de Karkengeschicht un de politsche Geschicht to weten. Denn aver doch Mekelnborg un de plattdüütschen Autoren (worraftig blots Mannslüüd): Griese över Reuter, denn Rudolf Hartmann. Un Hartwig Suhrbier nimmt uns mit in de Zeitungswelt – to de Tiet, as Brinckman, Reuter und Reinhard schrieven deen.

Ok dat Klaus-Groth-Johr warrt fiert: As Vörsitter vun de Groth-Gesellschaft gifft Robert Langhanke Bericht vun Leven, Wark un Rezeption. Barbara Scheuermann nimmt sik Lyrik un Prosa vör. Dat aver nich blots de groten Namen in’t 19. Johrhunnert mit Platt befaat hebbt, man dat vele Bildungsbörgers na Platt henkeken hebbt, dor leggt Sebastian Göttel sien Bidrag över den Lexikograf Daniel Sanders Tüügnis vun af.

En Handvull Autoren levert aktuelle Leesstücken: Mahnke, Rogge, Steckling. Un an’t Enn: Allens üm de Ehrenbreven an August Bath un Arnold Hückstädt.

 

Ratzeburg – Inselstadt an der Grenze Mecklenburgs. Hrsg. im Auftrag der Fritz Reuter Gesellschaft von Jürgen Grote, Barbara Scheuermann und Dieter Stellmacher. Beiträge der Fritz Reuter Gesellschaft, Bd. 30. Hinstorff : Rostock 2020, 144 S.

ISBN: 978-3-356-02297-1