29.12.2020

Vun fröher vertellt

Vertellen nich to'n Lesen, man to’n Anhören – dat is wat för düüstere Winterdaag. Wat hier vertellt warrt, dreiht sik allens üm Hamborg, in en Tiet, de al wiet torüchliggt. Alldagsleven, as wi dat vundaag nich mehr kennt. Biller vun Mann un Fro, de mit uns Leven (meist) nix to doon hebbt. Allens is sinnig un troschüllig (wenn een mal vun Hermann Claudius siene Gedichten afsüht). To hören sünd Stücken vun Hertha Borchert, Magreta Brandt, Hermann Claudius, Joachim Mähl un Wilfried Wroost.

As Lesers wiest sik Lüüd, de bi de Verenigung un de Tietschrift „Quickborn“ mitmaakt: Christiane Batra, Bolko Bullerdiek, Johanna Kastendiek, Petra Kücklich un Heiko Thomsen. Se waagt dat, wat vörtolesen un so Platt in de Ohren vun de Minschen to bringen. Bi de Utspraak schull de een oder anner aver doch en beten mehr oppassen.

De Opnahmen sünd in de Nedderdüütsche Bibliothek vun de Carl-Toepfer-Stiftung maakt worrn. Rutgeven hett de CD de Verenigung Quickborn in Hamborg.

 

Luuster mol torüch. Hrsg. von der Quickborn Vereinigung für niederdeutsche Sprache und Literatur e. V. Quickborn-Verlag : Hamburg 2020.

ISBN: 978-3-87651-465-9

« Zurück