08.10.2020

Ut de Schrievwarksteed

Düt Book treckt en Streek ünner 30 Johr Schrievwarksteed bi den Schleswig-Holsteenschen Heimatbund. Vertellen vun 30 Schrieverslüüd sünd dor afdruckt, blots en Handvull hebbt annerwegens al mal wat drucken laten. Wat en rutkennen kann: Düsse Schrieverslüüd hebbt en Plaan. Un se hebbt wat to vertellen.

Jümmers geiht dat üm Minschen. Wat se beleevt un wat jem ümdrifft. Un ok wenn dor so’n Idee vun School mit bi is – to’n Glück hett jeedeen vun de 13 Mannslüüd un 17 Froens sien oder ehr egen Sicht op de Welt un en egen Handschrift.

De Vertellen wiest ok: Schrieven, dat maakt de Minschen Spaaß. Un för dat Lesen gellt dat ja sounso.

 

Över uns un anner Lüüd. 30 Johr Schrievwarksteed. Rutgeven vun den Sleswig-Holsteenschen Heimatbund. Quickborn-Verlag : Hamburg 2020, 143 S.

ISBN: 978-3-87651-476-5