16.04.2020

Spelen

Nich blots mit Singen un Danzen köönt de ganz Lütten Platt lehren – nee, ok bi’t Spelen. Un hier kümmt de grote Wörpel op’t Tapeet. Den kann een bi den Amiguitos-Verlag bestellen un wenn een denn de ünnerscheedlichen Vörlagen in dree Wörpels dor rinboot, denn tellt de nich blots vun 1 bet 6, man denn sünd dor Saken oder Deerten op, de in een Satz tohoopbröcht warrn mööt.

De Grundidee vun “Dice Games” sett de Verlag för vele Spraken üm. Un nu ok för Platt. Tosamen sünd dat 15 Spraak-Spele, de so tohoopkaamt: Tallen, antrecken, Familie un so. För jeedeen Speel sünd de Kopiervörlagen afdruckt; denn: wat noch dorto kann, as en Teddy oder en Tafel; denn: wat schall bi dat Speel rutkamen; un: wat för Regeln gifft dat?

Verwunnerlich is, dat op Platt nich Gavel oder Schaap schreven warrt, man Gåvel un Schååp. Un ok wenn dat enige Plattsnackers swoor fallt: Wöör as Wörpel un wörpeln höört sik doch recht wat puristisch an. Mensing schrifft vör hunnert Johr in sien Wöörbook: “Wörpel, m., nicht sehr gebräuchlich, dafür vielfach schon die hochd. Form”.

 

Wörpelspele. Anleitungen för 15 Spele mit 3 Wörpels – Würfelspiele. Anleitungen für 15 Spiele mit 3 Würfeln. Amiguitos : Hamburg 2019, 39 S.

ISBN 978-3-943079-87-6

« Zurück