06.05.2020

Miene Lüüd

Matthias Stührwoldt is en Geschichtenverteller. He bruukt siene Tohörers, op best is so’n vullen Saal, un all luustert se em to. As op siene veerte plattdüütsche CD “Romantik”. De Lüüd nehmt em af, dat he vun sik vertellt: Vun den Melkbuer, sien Fro, siene fief Kinner, siene Öllern. In de Vertellen kann sik jeedeen op de een oder anner Oort wedderfinnen. Un mit sien drögen Humor kettelt he dat Lachen ut de Lüüd rut.

Woans föhrt sik en Mann, de Vadder warrn schall, in den Kreißsaaal op? Woso fohrt Kinner, de den Föhrerschien frisch maakt hebbt, Bulen in Vadder sien oder Mudder ehr Auto? Woso köönt wi uns nich vörstellen, dat uns egen Öllern sik küsst oder noch annerswat mit’nanner hebbt?

Authentisch un biografisch heet ok: So un nich anners is dat Leven in Schleswig-Holsteen. Man dor kümmt dat ja gor nich op an. Dat wichtigst is: Dat is en gode Geschicht.

 

Matthias Stührwoldt: Romantik un wat dorbi rutkümmt. Quickborn-Verlag : Hanburg 2020, 74:01 Minuten

ISBN 978-3-87651-463-5

« Zurück