07.12.2020

Klenner 2021

Dat een mit Plattdüütsch dör dat Johr kamen kann, dat hebbt al de "Wöör mit Wuddeln"-Klenner 2019 un 2020 wiest, de dat INS in den verleden beiden Johren rutgeven harr. Den Anfang maakt för 2021 "Nehm di nix vör...", un an't End steiht de "Sottje". Dortwüschen jede Week en anner Woort un Snack - woans se bruukt warrt, wat se bedüden doot un woneem se herkaamt.

Eenmal in'n Maand gifft dat en Landkoort to bekieken. Dor kann een denn sehn, wo ünnerscheedlich Platt is. Woneem heet dat "trecken" un woneem "tehn"? Woneem seggt de Lüüd "wi loopt" un woneem "wi lopen"? To de Texten hett Anemone Schulze-Herringen Biller un Klören dortogeven. Rutkamen is: Dat Johr is een groten Regenbagen.

Dat INS schickt den Klenner in de ganze Welt rut. Un hofft, dat de klenner den een oder annern so goot gefallt, dat se oder he Liddmaat warrt.