24.09.2020

Klappmuul weet Bescheed

Wat so’n Klappmuul is, dat beleevt ja en Barg, un dat weet noch mehr to vertellen. Denn dat snackt ja eenfach so los. Dat mütt sik ok kene Gedanken över dat Öller-Warrn un den Dood maken. Un so kriegt wi en Barg to lesen vun dat, wat to dat Leven vundaag tohören deit. Dorto Technik, unnützen un neemoodschen Kraam.

De Speler achter de Popp, dat is Detlef Wutschik, de nu al en Reeg vun Johren mit Werner Momsen op de Bühn steiht oder annerwegens sien Spijöök maakt. Na “Dag ok ...” is dat dat twete Book, wedder mit Geschichten, de al mal bi “Hör mal ’n beten to” lopen sünd.

Schall mi mal verlangen, wat Werner Momsen, wenn he mit seine Geschichten ünnerwegens is, ok en Dook vör Nääs un Mund trecken mütt…

 

Werner Momsen: Minsch blieven… Quickborn-Verlag : Hamburg 2020, 88 S.

ISBN: 978-3-87651-472-7