15.02.2021

Dat Leven dör Spiekermann sien Brill

Jüst in Corona-Tieden is Lesen en gode Medizin. Jede enkelte lütte Geschicht vun Gerd Spiekermann is as so’n Druppen oder Tablett, de di wiest, wat in dat Leven allens binnensteken deit. Gifft ja Saken, de hett jeedeen al mal beleevt, mit dat Telefon, mit den Computer un so. Un gifft ok snaakschen Kraam bi dat, wat de Minschen maakt: De een leest Böker, dat de anner Lüüd em dorbi seht un meent, wat he för en kloken Minsch is. De anner will vun sien Fründ weten, wat em sien ne’e Jack ok goot steiht – man will he dat würklich?

Mit siene över 15 Böker is Gerd Spiekermann ok wat öller worrn. Nu is he al op Rente, un dor vertellt he ok vun. Man op sien Oort is he jümmers noch dorbi, dat he nipp un nau henkieken un henhören deit. He fangt dat in, dat Leven üm em rüm, un vertellt dat nee. Mit de Wohrheit hett dat nix to doon, man mit Geschichten, de uns Leven schrifft. De meisten sünd kort un op den Poeng schreven – man dat gifft ok dree Stücken, de wat länger loopt.

Vörn in dat Inhaltsverteeknis sünd all de Siedentallen 2 Nummern to groot ansett. Mag ja ween, de Schriever wull, dat de Lesers jümehr Brägen twüschendör so’n beten in Gang hoolt.

 

Gerd Spiekermann: Wat’n Last mit de Wohrheit. Hamburg : Quickborn-Verlag 2020. 104 S.

ISBN: 978-3-87661-475-8