All Böker vun ’t  Instituut för nedderdüütsch Spraak sünd för dat ganze plattdüütsche Flach dor. Dat is wat besünners. Wat wi Johrenden an Böker tohoop raken deen, is meist as wussen. Jan un alle Mann kann sick Böker un annern Medienkraam bloots in uns Hüüs ankieken. Man dor gifft dat för jedeen ’n geruhig Steed. Un so ’n Kasten, wo ’n mit affotografert, is ook dor. Lesen köst nix. Elk un een kann kamen, wenn dat INS apen is. De Lüüd, de dor an ’t Schirrwarken sünd, kann ’n düchtig befragen, na enkelte Böker un wat dat op sick hett mit Literatuur op platt. 

Opstunns staht för Lüüd, de uns besöcht, wat bi 25.000 Saken praat (Böker, Bläder, Noten CDs/MCs, DVDs un Videos/CD-ROMs/DVD-Roms). All Böker, de bi dat Instituut för nedderdüütsche Spraak dor sünd, hebbt wi in so ’n DV-System rinschreben. Dat elk un een Online ruutfinnen kann, wat wi an Böker hebbt. Nakieken un söken kann ’n dat allens ook över den Regionalkatalog RegioKat Bremen.
Dat INS is Maat bi ’n Landesverband des Deutschen Bibliotheksverbandes e. V. (dbv).
För dat noch mehr Lüüd plattdüütsche Böker lesen köönt, maakt dat Instituut för nedderdüütsch Spraak wat tosamen mit de Stadtbibliothek Bremen. In ehr Zentralbibliothek (Am Wall) wiest de Stadtbibliothek üm un bi 200 Böker un CDs op platt. De kann Jan un alle Mann uutlehnen. Ditt Bott wesselt vun Tied to Tied.    

De Böker, de wi bi ’t Instituut för nedderdüütsch Spraak tohoop raken doht, gifft dat so annerswo nich. Se wiest, wat mit Platt an is in verscheden Rebeeden un jüst so op de Flachs vun Spraak un Kultuur. De Böker, de wi tosamenkleit, dat is, wat Lüüd vun de Midd vun ’t 19. Johrhunnert an op platt opschrieven deen. Sünd Böker bi, wo welk wat vun Schrieverslüüd sammelt hebbt, de vun verscheden Kanten her sünd oder mit Geschichten in, de sick elk un een fröher maal vertellen deen. Gifft Böker mit Leeder binnen to ’n Singen un Böker för Muskanten, dat se opspelen köönt. Gifft Böker, wo wat för Theotermaker binnen steiht oder Böker mit Saken in, de ’n eens in ’t Radio bi toluustern kunn. Babento hebbt wi ganz veel Tiedenbläder un Böker, de Facklüüd schreben hebbt op mennigeen Kant vun Spraak,  Literatuur un anners noch wat. Wiederhen hebbt wi ’n staatsche Reeg Wöörböker un babento Böker, wo tomeist junge Lüüd se ehr Examens mit maken deen. Wi sammelt stüttig wieder, nich bloots Böker. Nee! CDs, Videos un DVDs, de wat mit Platt to dohn hebbt, höört dor ook mit bi. Wat de Facklüüd griese Literatuur nöömt (Bläder vun Vereenen, Theoterzädels un sowat), dat sammelt wi ook. So ’n Kraam gifft dat op de plattdüütsche Kant, de vun Oort to Oort düchtig verscheden is, ganz veel.

De Rüüm, wo de Böker vun ’t Instituut för nedderdüütsch Spraak opstellt sünd, dat is ook ’n Oort, wo ’n sick bemött un mit ’anner reden kann. Wenn welk dat verlangen sünd un mehr weten wüllt, denn föhrt wi de Lüüd, wat dat nu Schölers sünd oder anner Koppels, dörch düsse Rüüm mit Böker binnen. Man dat mutt vörweg afsnackt warrn. Dat INS maakt jümmer wedder bi de dbv-Aktschoon „Deutschland liest. Treffpunkt Bibliotkek“ mit. Denn kümmt Schrieverslüüd in ’t Huus un leest wat vör op platt. (UL)