Dat Instituut för nedderdüütsch Spraak is 'n egen Zentralsteed för dat Rebeet Plattdüütsch. Hier ward allens daan, disse Spraak, ehr Literatuur un ehr Kultuur Updrifft un Hölp to geven.

Na wissenschaftlich utricht Aart un Wies ward meist allens in un över Plattdüütsch sammelt, ünnersöcht un för de Öffentlichkeit tohoopstellt.

Dat Instituut för nedderdüütsch Spraak helpt all Lüüd, de sik vun Amts wegen orrer privaat för't Nedderdüütsche insetten doot un de wat vun orrer över Plattdüütsch weten wüllt.

De Arbeitssteed vun dat Instituut is in Bremen. Se is inricht vun 'n Vereen. De norddüütschen Bundslänner stüert Geld för de Arbeit mit to. Dat Seggen hett alleen de Vereen.

De Upgaven vun dat Instituut sind:

• wi sammelt jeedeen Aart vun plattdüütsch Texten, sünnerlich de ut uns Tiet;
• wenn jichtenseen Fragen hett vunwegen dat Plattdüütsche, na Texten orrer Schrieverslüüd, denn antert un helpt wi em;
• wi maakt uns Arbeit künnig in Schriften, Vordrääg orrer anner Veranstalten;
• vun't Plattdüütsche un de Regionalkultuur schall jedereen to weten kriegen, daarüm maakt wi dat ok de Presse künnig;
• wi seht to, dat all tosamenarbeiden un sik gegensiedig helpen doot, dat gellt sünnerlich för all de enkelten Lüüd un Vereene, de wat för Plattdüütsch doot, man ook för Institutschonen buten de Spraak- un Staatsgrenz, de sik op de sülvige Aart för Regionalspraken insetten. (FM)