Meermärken - up Hooch un Platt
Kategorie: Neuerscheinungen:Een Billerbook för de Ohren
„Es war vielleicht gerade Zeit, diese Märchen festzuhalten, da diejenigen, die sie bewahren sollen, immer seltener werden …“ – so steiht dat to lesen in de Vörreed vun de Gebröder Grimm to'n eersten Part vun ehr "Kinner- un Huusmärken" vun 1812.
Tweehunnert Jahren later sünd dat nu söben noorddüütsche Märken, de in een Billerbook för de Ohren vun de Noordsee mit ehr wunnerhaftigen Deerten un wat annswat noch daar suust, swimmt un dükert, vördaag kummt, wat daar nu Fischerslüüd orrer een Hüün tohöört, vertellt ward de olen Geschichten nu nie, dat se nich verschütt gaht.
För ‚Meeresmärchen', up Platt "Meermärken", hett Linde Knoch de Märken vun dunntomalen sachtmodig in niege Wöör vun hüüt sett. De Märkenfrünnen vun lütt bit groot köönt de Spegelplaat tolustern un mit de Billers vun't Book in de vertöverte Welt vun't natte Land indükern. De Illustratersche Dorothée Böhlke ut Hamborch wiest mit ehr abasig Künsten bi't Billermaken de Geschichten vun de Noordseekönigsche, vun't gediegen Kristallslot vun de Meerfru, dat Strieden tegen Wellenpeer un Wulkenscheep, ruchbannig Hünen, afgünstig Fisch, den Meerkeerl Ekke Nekkepenn, modige Fahrenslüüd un daarvun, wat een Zaubermöhl mit dat Salt in't Water to doon hett.
Dörchgahns sünd all de Märken up de Spegelplaat tosamendaan mit Luten, de daarto passt: Harpe Sønke speelt för dull sachten sien Harp, daarto gifft dat Meer pur: dat Schriegen vun de Möven, den Wind un dat Ruschen vun de Wellen.
Märken hebbt to doon mit de Dingen vun vör Ort, dat is de Regioon. Dennso gifft dat ok een Törn, de is maakt in den „O-Ton" vun'n Noorden - up Platt. De Texten vun Linde Knoch hett Frerk Möller na Platt bröcht, Marianne Ehlers hett dat up Platt vördregen.
Meermärken
Een Billerbook för de Ohren
Bilder- und Hörbuch |Spielzeit CD [53:57 Min]
30 Seiten | Gebunden | Format 15,5 x 15,5 cm
ISBN: 978-3-9813907-4-2
Willegoos, Potsdam
Linde Knoch (Texte)
Dorothée Böhlke (Illustrationen)
Marianne Ehlers (Erzählerin)
Frerk Möller (Übersetzung)
19,95 € (D)
und auf hoch:
Meeresmärchen
Ein Bilderbuch für die Ohren
Bilder- und Hörbuch |Spielzeit CD [57:19 Min]
30 Seiten | Gebunden | Format 15,5 x 15,5 cm
ISBN: 978-3-9813907-3-5
Willegoos, Potsdam
Linde Knoch (Texte und Erzählerin)
Dorothée Böhlke (Illustrationen)
19,95 € (D) (FM)