Eenfoldig Tripthychon ahn König

In ole Karken
achter den Altoor
finnst du faken
en Dreeschapp.

De bleken Biller wiest us
dat Minschenkind sien Leven.

Jümmers sünd dor
de hilligen dree König.
De sünd ja ut Syriah kamen.

Mien Dreeschapp is eenfoldig.
Hillig sünd nu woller Kriegen.

Un Abu-Bakr
böört keen Guld,
man den Dood.
Un Hafiz
bringt en Fatt,
Sarin is dor binn’.

Beid sünd se laat,
kaamt na Golgatha,
nich na Bethlehem.

Dat liggt achter Kobane.
Peschmerga-Harder kennt den Weg,
nich den Steern.

Tohuus liggt in de Meern.
Dat is eendoont, wo du büst.
Du büst op düsse eene Welt.

Hillig Avend
blifft de Leevde de Leevde.
Dreiht sik de Eer nich annersrüm.

Wi sitt tohoop
mang de Gavenwennst,
mang de Butenbiller,
mang den Binnendroom.

Föhlen is wat anners
as Weten.
Keen Aten vundaag
wedder dat daakig rode
Twüschen.

Hillig Avend
blifft de Leevde de Leevde.
Dreiht sik de Eer nich annersrüm.

Wi sünd in de Meern tohuus
an’n Hilligen Avend.
Nich bloots.

Jim, Jonny un Jonas
döögt nich
as Königen.

Walter Henschen

1945 bin ik in Achim bi Bremen in düsse Welt kamen. Platt hebb ik bi miene Daagmoder lehrt, man över de Johr'n harr ik veel dorvun vergeten. Nu finn ik suttje woller trüch in miene Daagmoder ehr Spraak: mit Snacken, Schrieven, Översettten. Na 35 Johr Schoolmester un Schoolraat maak ik nu Plattpolitik in den Bundesraat för Nedderdüütsch, den Runnen Disch Plattdüütsch for Bremen un Bremerhaben un in den Biraat Nedderdüütsch bi de Brem'sche Börgerschap