Wat

Wat seggt de Medien,
de Markt?
Wat kriggt us Dannenboom
för 'n Farv?
Wat schüllt wi drinken,
schüllt wi eten?
Froog gau mool no,
dat mööt wi weten -
is us wat wert,
ans fiert wi Wiehnachten
verkehrt.

Wiehnachten luurt

Och, wo schön is 't in 'n Oktober,
Engels stoht in 'n Supermarkt,
Wiehnachtsmann met Folie rober
hett 'n Priesschild üm un lacht.

Goh vörbi an bruune Koken,
in de Nees stiggt mi Kaneel,
kann dat Glück meist goor nich foten,
miene Welt is jo so heel.

Ursel Meyer

Ek bün 'n Baier Deern. In Bain (Barrien) gifft 't keen Krankenhuus, dorum hefft se mi 1944 in Bremen op de Welt hulpen.

Mi dücht, Wiehnachten ward von Johr to Johr mehr to 'n Konsumparadies. Kloor, mutt jümmer noch 'n Dannenboom her, draff nich fehlen, jüst as an Halloween de Kürbis, oder bi 'n Valentinsdag de Blomen. Wat bringt de ganze Kroom? Ek wünsch mi Tiet, Vertroon, datt 'n met mi snackt, ek föhl, datt wen geern an mien Siet is, mi stütt, wenn 't wesen mutt. Dat schollen ok miene Geschenke an annere wesen.

De Sprook bedüüdt mi wat. Dat Vondoog, dat Nu verkloort se mi. Steiht längs alls vör us Döör, seggt se. Man ok dat Gistern lett se lebennig weern, hört to mien Wuddeln to. Ek leev al lange Tiet in Melchiorshusen, von mien Kökenfinster ut kann 'k den Karktoorn von Bain sehn, deit mi goot. Passt alls wunnerboor in de Wiehnachtstiet. De hilligen dree Könige schüllt jo mool döör Melchiorshusen komen wesen.