Stille Nacht

Loot mi doch
dat beten Lucht,
loot mi eenfach hopen,
datt Engel
use Welt regeert.
Kann so al
knapp noch slopen.

Wünsche

Kiek mool,
wat is de Mattschiev so bunt?
Dat is de Werbung,
bi de geiht 't rund.
Se weevt
den allersöötsten Droom
för Wünsche
Unner 'n Dannenboom.

Online

Och Wienachtsmann,
du ole Kerl, wat is 't ok bloß
för 'n Kummer.
Ek woll di simsen,
man ek heff
nich dien Handynummer.
Nu sitt ek hier
un koom nich wieter.
Amenn krieg ek di
ober Twitter?

Ursel Meyer

Ek bün 'n Baier Deern. In Bain (Barrien) gifft 't keen Krankenhuus, dorum hefft se mi 1944 in Bremen op de Welt hulpen.

Mi dücht, Wiehnachten ward von Johr to Johr mehr to 'n Konsumparadies. Kloor, mutt jümmer noch 'n Dannenboom her, draff nich fehlen, jüst as an Halloween de Kürbis, oder bi 'n Valentinsdag de Blomen. Wat bringt de ganze Kroom? Ek wünsch mi Tiet, Vertroon, datt 'n met mi snackt, ek föhl, datt wen geern an mien Siet is, mi stütt, wenn 't wesen mutt. Dat schollen ok miene Geschenke an annere wesen.

De Sprook bedüüdt mi wat. Dat Vondoog, dat Nu verkloort se mi. Steiht längs alls vör us Döör, seggt se. Man ok dat Gistern lett se lebennig weern, hört to mien Wuddeln to. Ek leev al lange Tiet in Melchiorshusen, von mien Kökenfinster ut kann 'k den Karktoorn von Bain sehn, deit mi goot. Passt alls wunnerboor in de Wiehnachtstiet. De hilligen dree Könige schüllt jo mool döör Melchiorshusen komen wesen.