Wiehnachtsmann, oh Wiehnachtsmann

Wiehnachtsmann, oh Wiehnachtsmann
keen glövt dor denn woll noch an
denn de Kerl is virtuell
eentli wahnt he inne Höll
ward betahlt vun Shell un Gutschi
wenn he kummt is ‘t Geld glieks futschi
dien Verlust: phänomenal
dat is „neoliberal“

Mit ‘n Drohne un Propeller
ward dat nu noch virtueller
deist du op de Äpp rop klicken
dohn se di den Schiet al schicken
un denn kummt so as de Blitz
Drohne mit ‘n Wiehnachsmütz
un se kickt di glöönich an:
Moin, ik bün de „e-nachsman“

(Dat‘s de grote Öko-Hit
wiel dat Ding je ok nich schitt
as dat Rentier bi dat Fleegen
dat is doch ‘n Öko-Segen
Wiehnachsmann, de ool verpennte
de kann denn je nu in Rente
un de Gören, nich ganz ohne
lenkt de Öllern, un de Drohne
de hem dorto ok Talent
dat is, wat man Fortschritt nennt)

Rainer Prüß

Ik leev nu siet 40 Johr in Flensborg, awer min Platt is ut Dithmarschen, dor kaam ik her. Riemels maak ik al 30 Johr. Maakt Spaß, wiel man bi't ”Dichten" sik glieks vörstellen kann, wat Lüd denn denken doht: „De ol Dichter is je ni ganz dicht".