Wiehnachtsfreden

Wenn de Frost regeert de Welt
fallt witte Steerns van’t Himmelstelt,
leggt sik at een dicken Kragen
över Bülten, Wisch un Hagen.
Deckt all Unrast un Gedoo
mit een witte Laken to.
Karkenklock vertellt van Freden.
Minschenheit schall sik nu verdregen.
Kiekt de Lüe jüüst nu vergrellt,
dor kien Verstahn mehr in de Welt?
Freden is woll bloots een Droom.
Lichter brennt an’ Dannenboom.

De Wunschzeddel

Oh Sünnerclaas, du gode Mann,
ik weet nich, wo ik di dat verklaren kann.
Dat ganze Johr mööt ik dor an denken
wo’t afloppt mit dat Wünschen un dat Schenken.

Mien Wunschzeddel harrst du sülvst mitnahmen,
doch dor is uplest nich veel bi röver kamen.
De Wiehnachtsmann hett‘ sachs verkehrt afgäven
un anner Kinner hebbt de moi’n Saken kregen.

Weest noch, ik wull een Autorennbahn,
dat ik gägen Navers Jan Rennen winnen kann.
He is ja up sien Iesenbahn ganz stolt,
dorbi is de man bloots slichtweg ut Holt.

Aver ünnern Dannenboom stunn een elektrisch Toch
mit Hüser, Kaark un Tonnel, ok Gleise geev dat noch un noch.
Dor is Vader nu mit togangen, ganz ievrig dorbi.
De Wiehnachtsmann dacht mehr an em at an mi.

Up mien Wunschzeddel stunn een Skateboard.
Meenst du, dat dor wat van wurrd?
Nee, dat Skateboard hett Navers Jan nu kregen
un ik mööt mit Inliners wieter dör de Gegend fegen.

So leep dat mit all mien Goven rein vördwars.
Bloots us Lüttje freu sik to den Teddy at narrsch.
Moder meen: Jung, nu wees doch tofreden,
Footballschoh un Böker hest ja ok noch kregen.

Se leet mi weten, dat geiht so nich an,
dat man all Wünsche erfüllt kriegen kann.
Wecke Wunsch uplest in Erfüllung geiht,
mit Vaders Geldknipp fallt or steiht!

Oh Sünnerclaas, schull dat stimmen, wat Moder dor vertellt,
un Vader ut sien Knipp betahlt, wat wi bi di bestellt?
Denn wünsch ik mi rein gor nix mehr, wenn he dat doch betahlt,
denn gah ik foorts to’n Laden rin un kööp, wat mi gefallt!

Ingeborg Huisken

Wurde 1946 in Varel/Friesland geboren. Seit 1972 lebt sie in Wiefelstede im Landkreis Ammerland. Sie hat Plattdeutsch schon als Kind geliebt und 1989 selbt mit dem Schreiben begonnen. Viele Jahre hat sie sich im Schriever-Kring engagiert. Für sie gillt: "Eenmal Plattdüütsch, ümmer Plattdüütsch."