Domino

August is noch nich ganz vörbi,
schuuv mi bi´n Kopman dör de Regen,
heff Janker na so´n Slickerie,
Pott Ies wöör nu de wohre Segen.

Ik glööv dat nich, wo kann dat sien?
Is dat dor Spekulatius?
Buten ballert Sünnenschien
Binnen Wiehnachten in Överfluss.

Pah, denk ik , doch nich mit mi,
dor kiek ik nichmol hen,
rutsch mi de Puckel rünner mit de Wiehnachtsfierie,
na Strand un Flipflops un kolt Ies steiht mi de Sinn.

September sünd se denn nu dor...
ohhh, mien Dominosteen.. swatt un witt,
heff dorop töövt dat ganze Johr,
blots.. noch is dat doch veel to hitt.

Oktober kümmt mit warme Daag,
in Goarn, ik kann´t nich faten,
dor bleuht en Primel, root un zoort,
man, mien Gedanken köönt von Dominosteen nich laten.

November is - un duster meist,
langt mi noch nich to Wiehnachtstimmung,
mien Dominosteen, ok wenn du mi so anplinkern deist,
dor fehlt mi noch wat an Besinnung.

Dezember, nu is dat so wiet,
Wiehnachtstimmung ok bi mi,
besinnlich Wiehnachtswuselinkoopstiet,
mien söte Steen, ik heff noch gor keen Roh för di.

Wiehnachtsrummel, Plettenbackenslickerie
vun en Fier to anner hen,
Dominosteen, deit mi leed för di,
dor passt du nich mehr rin.

Dat Johr is ut, de Lief hett Roh,
gnaastert bannig in Korsett,
dat Motto heet nu wedder so:
Keen Slickerie un ok keen Fett.

Januar kannst noch allens kopen,
sogor mit ornlich Rabatt,
blots na Dominosteen bün ik vergevens lopen,
un de harr ik nu so geern hatt.

Gunda Gey

Gunda Gey is 51 Johr olt. Boren un opwussen is se in Riesby in Schwansen. Vele Johren al speelt se plattdüütsch Theater. 2009 hett se dat "Riesby Schlietheater" grünnt. Dörch de Schrievwarksteed vun den Schleswig-Holsteinischen Heimatbund hett se ehr Schrieven jümmer wieder vöran bröcht. Se schrifft nu de Theaterstücken för ehr Veranstalten sülvst un översett Texte un Märken ut Hoochdüütsche. Plattdüütsche Gedichten sünd en ganz niege Opgaav för ehr. Gunda Gey wahnt jümmers noch mit ehr Mann in Riesby, hett 2 grote Kinner un arbeidt in ehr egen lütt Firma as "Bürodienstleisterin".