Ostermann un Wiehnachtshaas

Um Ostern un in d’ Wiehnachtstied,
denn is dat weer `n maal sowied:
De Wiehnachtshaas un Ostermann –
wo sowat wall geböhren kann,
sehn sük in `t Jahr blot en paar Stünnen
un worden noit de beste Frünnen.

Se protjen over dit un datten
un futt hebben se sük al in d’ Klatten!
De Wiehnachtshaas will Eier schenken.
De Ostermann gifft to bedenken:
Bunt Eier unner d’ Wiehnachtsdann,
dat sowat wall neet angahn kann.

So geiht hör dat tweemaal in `t Jahr
un daarum kriegen se nix klaar.
Un well maakt nu de Kinner blied
to Wiehnachten – in d’ Ostertied?
Grootollen, Ollen, Unkels, Tanten
un all de anner Anverwandten!

Gitta un Udo Franken

Ik koom ut Oostfreesland un wohn in Südbrookmerland. Ik bün Ledermakerske, maak Musik mit mien Grupp „Dreebladd“, un bün Schrieverske. Ik proot un sing un schriev up Oostfreesk Platt, umdat dat mien Spraak is.

Ik stamm ut Emden un leev nu in Südbrookmerland. Ik bün Autor up verscheden Rebetten, restaureer oll Musikinstrumenten (to'n Bispill historische Lauten), un maak mit „Dreebladd“ ok Musik. Waarum stiggt en Bargstieger up en Barg? - Umdat he dat kann. Waarum schrifft en oostfreeske Autor up Platt? - Na...?