De Fleutenspeler

Liesen
leggt sik Snee op den grönen Boom
root schimmert de Kugeln
gollen glitzert de Steerns
warm schient de Lichten
en Engelchor singt so hell
de Fleutenspeler stimmt mit in
Knecht Ruprecht haalt ut sien groten Sack
för all de Kinner wat
dat rüükt so wunnerboor
na Braadappeln, Pepernööt,
Mandeln, Punsch un Kaneel.

Liesen geiht de Tiet dorhen
verklungen is dat feine Singen
wegflagen, de schöne Wiehnachtsruuch
bruun de Dannen un twei de Kugeln
vörbi dat Blenkern un de warme Schien
griesen Snee liggt an de Kant
eensam steiht he dor
de Fleutenspeler ut Steen
un Wiehnachten is he alleen.

Dörte Burgemann

Ik bün in Hohn op de Welt kamen un mit plattdüütsch opwussen. Vele Johrn heff ik in Hohn un Rendsborg leevt. Siet över 20 Johrn wahn ik in Kiel. Mit mien Familie snackt ik noch ümmer plattdüütsch. Un natürlich ok mit all de annern Lüüd, de dat köönt. To’n Schrieven op Platt bün ik eerst veel later kamen. För mi is dat: Afdükern vun'n Alldag un sik verpuusten. Yoga för de Seel.