Kiek eens – Wiehnachten hüüttodaags

Verleert de Heven dat Füerrot?
De lütt Engels backt nich mehr dat Broot.

Dat deit ok hüüt noch de Bäcker
so as fröher un bannig lecker.

Hüüttodaags is dat nu so wiet,
ok de lütt Engels gahn mit de Tiet.

Se laten backen de Studen
för all de hungrig Leckersnuten.

En Kokenmaschien stellt se an,
de vun alleen Stuten backen kann.

Zeddels leggt se bi, dor steiht op,
wo veel Kalorien dat tellt pro Kopp.

Un Sünnerclaas, de Helpersmann,
nimmt hüüt sogor en nie Namen an.

Nennt sik Knecht Ruprecht mit de Ruut
un langt mal na krötig Gören ut.

Köönt se Riemels rünner rappeln,
gifft dat en Gaav un wat to Knabbeln.

Na de Wiehnachtsmann mailt he denn
to welkt oordig Kinner he schall hen.

Sien Sleden hett hüüt Navi an,
dormit he de Kinner finnen kann.

De fiert mit Öllern op Hawaii,
mit Boom un Kugeln, de nich gahn twei.

Mit Mantel root un Boort in witt,
is he dor nich so de grote Hit.

He föhlt sik meist as fremde Mann,
denn man danzt ‚Hula‘ un hett nix an.

En frohe Fest to’n Besinnen,
kannst op de Welt nich överall finnen.

Hawaii hett ok de Heven root.
Sünnschien, Sand un Strand doon uns so goot.

Aver backt Engels dor Stuten,
för lütt un grote Leckersnuten?

Christa Roschek

Ik bün Rentnerin ut Flensborg. Un ...
Ik bin en Angeliter Deern
un snack plattdüütsch so bannig geern.
Siet mien Kinnertiet
geiht Platt mit mi mit.
De Heimatbund hett mi lehrt to schrieven,
un dat schall vun mi ut ok so blieven!