Wiehnacht? Nee, ok.

‘n paar Dagen schall dat woll noch duurn,
hett mien Kalenner jüst noch seggt.
Geiht wedder an, dat dösig Luurn,
dat is mi nienich recht.

Klaar bün ik bang, so as ‘t jeed Jahr
geiht mi dat allens half verdweer,
nu denn, ik heff jo Rootwien dor… .
Gau nehm ik mi en lütten Sluck
un denn warrt inköfft, ‘t mutt, wat mutt!
Nu noch en Lütten, un hauruck!
Ik maak dat even scheer.

Blots kann ik man den Schiet nich sehn,
nich Glimmer, Kers noch Dannen,
dat Blinkern kriggt mi meist an ’t Schreen.
De Sinnigheet? Toschannen.

‘n goden Rootwien? Rin in ‘n Wagen!
Veel schaden kann dat nich.
Keen Sorgen hett, hett ok …
un so is ‘t beter för en nervösen Magen.

So en Parkplatz kriggst du aardig vull
wenn dat op Wiehnacht geiht.
Sülvst ik heff bunkert, Tüüchs as dull,
de Rootwien helpt, meist warrd ik froh,
vun ’t Fleeschtheek her de Niklas kreiht.

Torüchoors to führen is nich keen Kunst,
ok nich an so enen Dag.
Man hest du Rootwien intus mag
dat angahn, dat dat rummst.

Vun Wiehnachten föhl ik kenen Fipps,
ik will dat gar nich fieren,
mien Naversch kummt, maal even plieren:
Denn Proost! Op unsen Swipps!

All dat Gejingel, all dat Licht,
in ’n Kiekkast wat to ’n Blarren,
in ’n Stall is ok noch wat inricht,
schall ik de Aant noch tarren?

Mien Fründin pingelt in mien Foon,
hett dwatsch ehren Köter peddt.
Hier strullt de Katt an ’n Wiehnachtsboom
-- ik glööv, ik gah to Bett!?

Birgit Lemmermann

Ik koom ut Klethen, dat is Ahlerstedt-Klethen in den Landkreis Stade, wohnen do ik in Ünnerst/ Unterstedt bi Rodenborg an de Wümm. Ik wark as Schoolmestersche för Kunst, Sport , Werken an dat Ratsgymnasium in Rodenborg, uterdem as Schreiversche, Illustratorsche, Verleggersche, un as free Huusfro. Schrieven is een Aart, mit dat Leven torecht to komen, un en Mööglichkeet, düchtig rümtospinnen.