Knoop för dat Wedder

Petrus, wi hebbt beslaten, dat mit dien Wedder mutt anners warrn. Wi wüllt mitsnacken. Wi wüllt Demokratie! Över dat Wedder warrt wi in Tokunft online afstimmen. Jeedeen hett een Stimm. Dien letzt Dunnerwedder hebbt wi noch nich vergeten. Uns stünn dat Water bet an’n Hals. Griesen Modder op dat nee'e Sofa. So en Malöör kann uns denn nich mehr passeren.
Ok wenn Petrus noch keen Ansluss an't Internet hett. De Telekom kann dat woll maken. Petrus bruukt denn blots noch op den roden Wedderknoop drücken. Aver wat is mit all de Lüüd, de in en nettfree'e Gegend wahnt? Dat is bannig leeg, uns fehlt denn Stimmen. Woso hett uns IT-Welt överhaupt twee Klassen? Ach so, dor sünd wi en Entwicklungsland. Wi weern mal Papst, nu sünd wi Sland, man bi en Knoop för dat Wedder mööt wi passen?

So, so Demokratie wüllt ji. Petrus schrappt sik över den griesen Boort. Minsch Lüüd, wat sünd ji opsternaatsch! Weddermaken, dat is mien Rebeet. Düsse Sommer is jo woll to Kopp stegen. En feinen, schönen Sommer. Süden in’n Noorden. Aver nee, ji sünd blots egalweg an’t Quesen. Dat is to hitt, to bruddig, de Sünn brennt to dull. Denkt doch mal an de Vördelen. Nich anstahn an’n Fleger, keen Rieten in de Knaken. Füerholt sporen, weniger Plünn to’t Waschen un keen Glatties.
Un wat is mit mi? Denk ji dor ok mal an? Ji püüstert mi soveel Schiet na baven, dat ik so männichmal gor nich daalkieken kann. So en Dunnerwedder, dat maakt de Luft fein rein. Un nu schall dat Wedder ut düssen vigelienschen Kasten kamen? Ji sünd woll narrsch.
Un överhaupt is mi so’n Kasten to vigeliensch. Stellt jo mal vör, de Stimmen kriegt sik op den Weg na baven in de Wull un dat gifft en Blackout oder en Tsunami kümmt in de Gang. Denn sitt ji aver böös in de Kniep. Womööglich fangt dat Ding an to Smölen un flüggt denn utenanner. Laat den Kassen un dat Nett man blots ünnen bi jo. Anners richt ji mit jon unegalen Fingers blots Schaden an. Nee, dat maak ik nich mit.

Dörte Burgemann

Ik bün in Hohn op de Welt kamen un mit plattdüütsch opwussen. Vele Johren heff ik in Hohn un Rendsborg leevt. Siet över 20 Johren wahn ik in Kiel. Mit mien Familie snackt ik noch ümmer plattdüütsch. Un natüürlich ok mit all de annern Lüüd, de dat köönt. To’n Schrieven op Platt bün ik eerst veel later kamen. För mi is dat: Afdükern vun'n Alldag un sik verpuusten. Yoga för de Seel.