Winrich Klymant "Dor is bannig wat in Gang ..."

Siet mien Kinnertiet is Football mien leevste Sport – nu al mehr as sösstig Johr lang. Keen harr in de veertiger Johren al en Ball ut Ledder? Mit en leddige Blickdoos güng dat ja ok – oder dree Poor tosamendreihte Strümp. Een vun de wichtigsten Regeln weer: Dree Ecken – en Ölvenmeter. Schiedsrichter? Nee, hebbt wi nich hatt! Mal hett mien Mannschaft Recht kregen bi’t Diskereren, mal de anner Siet. Veel hett sik siet düsse Tiet ännert.

Siet den 12. Juni is dat Spektakel vun de Football-Weltmeisterschaft in Brasilien nu al in Gang. Mien Tipp: De Amerikaners mit jümehren Trainer Jürgen Klinsmann warrt Weltmeister. Woso? As dat losgüng mit den professchonellen Football, dor geev dat eerst blots een Schiedsrichter. Denn kemen twee Linienrichters för de langen Sieden vun den Platz dorto un achteran noch twee Toorschiedsrichters. Vun buten vun dat Speelfeld müssen jüm noch en Reeg anner Lüüd ünner de Arms griepen: De weern dor tostännig för, dat de Spelers korrekt utwesselt warrt. Un denn noch een, de wies jümmers de Naspeeltieden op en Klock.

Wat de Schiedrichters seen, dat gell ok, so as dat „Amen“ in de Kark. Hett en Speler den Ball in’t Toor schaten, oder nich? Dat wüss man blots de Schiedsrichter. Ganz so as en lütten Herrgott, de anseggen kunn, wokeen de Nees vörn harr, un wokeen na Huus schickt worr; oder wat dat en Unentscheden weer. Hebbt wi ja ok allens al hatt: en Toor, dat keen Toor weer (dat Phantomtoor vun Stefan Kießling).

Dat schall sik nu ännern. To de WM in Brasilien hebbt se en Ball maakt mit en lütten Chip binnen so as en Mini-Computer. Nu leggt de Chip in den Ball fast: Weer dat en Toor, oder nich? So wull dat de FIFA hebben.

Nu geiht mien Geschicht egentlich eerst richtig los, un ik verkloor Se, wat dat mit mien WM-Tipp op sik hett:

Woso versöökt de Amerikaners woll mit vulle Kraft den „Whistleblower“ Edward Snowdon faat to kriegen? Düssen Kerl, de seggt hett: „Wenn ik de Wohrheit nich ünner de Lüüd bring, keen deit dat denn?“ Warrt seggt, kunn sogor de Dodesstraaf för em heten, wenn se em bi de Büx kriegt. He hett sien Vaderland verraden, warrt em vörsmeten.

Dat he vertellt hett, woans de NSA anner Lüüd afhöört, nee, dat is dat nich. Veel leger! Dat geiht üm dat Milliardenspeel Football. Wohrschau: Uli Hoeneß is ok mit vun de Partie. Woans hett de woll so veel Geld, dat he 27,2 Millionen Euro Stüern an dat Finanzamt vörbischummeln kunn? Brutto sünd dat mehr as 100 Millionen. Euro, nich Dollar! Ik segg blots: NSA!

Snowdon un Hoeneß hebbt dor Wind vun kregen, dat de Amerikaners ok den Ball, in den de Chip inboot is, verännern wullen, so as jüm dat passt. Snowdon, tja, de mutt nu bang üm sien Leven ween, wenn he doröver snacken deit. Hoeneß hebbt se mit en Barg Geld dorto bröcht, dat he den Mund holen deit.

Jürgen Klinsmann hett mit Hoeneß en Wett afslaten, dat he mit siene Jungs Weltmeister warrt. Un as Uli fraag, woso, hett Jürgen seggt: „Swieg man still, de NSA maakt dat al.“ Uli hett denn de NSA anropen un seggt: „So oder so! Se köönt sik dat utsöken.“ Un de hebbt seggt: „Denn man so!“

Leve Footballfrünnen! Se hebbt nu de Opgaav, nipp un nau to kieken, woans de Ball in Brasilien rullt, wenn de Trupp vun Jürgen Klinsmann an’t Ledder is.

As dat heet: In dat Land mit de „unbegrenzten Möglichkeiten“ is veles möglich.

Ik drück miene Duums aver för Jogi Löw un siene Jungs.

P.S.: Süh, af un an löppt dat doch anners, as een so denken deit …