Reinhard Goltz "Utwesseln"

Woso ik nu wedder? An’n Rand hebbt se al de Nummer Föffteihn tohööcht reckt. Wat bün ik lopen! Veel mehr as Paul op de anner Siet. Anners wat as Slieken kriggt de doch gor nich hen. Dorför is he den Trainer sien lütten Schiet-in-de-Büx. Hett annerletzt sogor in de Zeitung stahn. Un dorför mutt ik nu wedder rut. Kloor, de Acht hett mi tweemal stahn laten. Hett eben Glück hatt. Dat nächste Maal kümmt he op jeden Fall nich vörbi. Vörher haal ik em vun de Been. Is eerst fief Minuten her, dor hett he mi böös op de Töhn pett, de Bullerballer. Un de Schiri, wat maakt de Schiri? Nix. De weet ok nich, wat he will. Mal so, mal so, un jümmers gegen uns. Dor mutt een ja grandessig bi warrn. Ach nee, ok dat noch! Axel schall op mien Platz spelen. Jüst Axel. Nix as Tattoos op’t Liev un en Technik as Schuuvkoor. Gah mi af!