Marianne Ehlers "Swatt-Root-Gollen ... Football!"

Wenn Football an de Tour is, denn loopt de Klocken anners. Na kloor, nich jichenseen Football – nee, DE FOOTBALL-Weltmeisterschop. Un de is nu jüst an’t Lopen, un du schullst denken, de Lüüd sünd all en beten mall.

Na goot, Fahnen an’t Auto oder ok an’t Huus, dor hebbt wi uns an wennt, dat mag ja noch angahn. Un ok mit dat Fan-T-Shirt mutt ween, anners kann een nich vör dat Puschenkino sitten un mitfevern. Man den ganzen annern Kraam? Also, gah du mal in düsse Daag in en Supermarkt – dor sühst du blots noch swatt-root-gollen Tüdelüüt ... is dat Enn vun weg!

Egentlich will ik Tomaten un Salat, Broot un Kees inköpen, villicht ok noch en lütt Buddel Beer ... Man dorto mutt ik eerstmal vörbi an grote Papp-Opstellers mit Kantüffelchips, Eerdnööt, Schokoladenstangen un Lollys. De Lollys heet Chupa Chups un sünd meist so groot as de Kopp vun en Babypopp. Kannst lang an rümslickern, langt seker för 90 Minuten Footballspeel. Du leve Tiet! Un allens inpackt in swatt-root-gollen Poppier. Överall Düütschland, ok op de Beerdosen – ik kann dat nich faten!

Ik maak mi so mien Gedanken, woans denn woll so en Dag vun en normalen Fan bi de Football-Weltmeisterschop so utsehn mag. Also, morgens duuscht he sik eerstmal un maakt sik smuck för den Dag. Un dorto nimmt he denn dat Shampoo, wat de Natschonalmannschop in Süüdamerika to’n Frischmaken bruken deit.

Denn maakt he sik en Kaffe un snitt sik en poor düchtige Schieven vun dat frische Weltmeester-Broot af. Dat gifft Knööv för den Dag, oha! Dor smeert he sik denn de Sönner-Edischoon vun düsse gode Soort vun Nööt-Nougat-Creme op dat Broot. De Kaffe is intwüschen in den Football-Beker lannt – originaal as Warf-Geschenk vun dat Sport-Magazin. Dor hett he Billers vun sammelt un in en Album kleevt. Ehr he in de Firma föhrt, packt he sik noch en poor Joghurt-Bekers mit Schoko-Kugeln in Footballform in – en Tüüt vull Gummiboren – ach nee, Gummifahnen, mööt ok noch mit. Denn stiggt he in sien Auto un justeert de swatt-root-gollen Fahnen noch mal na. Un de Butenspegels kriegt noch Övertreckers, de sünd, ja richtig: swatt-root-gollen!

Ja, düsse Fan höört to de üm un bi 25 Millionen Lüüd in uns Land, de jeedeen Footballspeel ankieken doot. Vele hebbt sik sogor Urlaub nahmen, um ok reinweg nix to verpassen. Uns Fan mutt ja arbeiden. Man wenn, wenn he na Huus kümmt, denn geiht dat so richtig los. Denn haalt he sik de Fan-Snack-Box „Chips ut Rio“ her un maakt sik dat eerste Beer op. Dat kümmt, na kloor, ut Brasilien.

Nu kann dat losgahn. Noch gau de passliche Kledaasch an, de Fahn herkriegen, ach ja, un den Schaal umtüdeln. Wenn denn dat Speel anfleut is, kann gor nix mehr scheef gahn. Nu mööt de Düütschen, also wi all tohoop, blots noch winnen. Mehr mutt ja nich. Man dat is doch ok nich toveel verlangt, oder? Wenn de Fans un de Ladens sik so inbringen doot?

Kiek doch mal, dor kümmt de Kater üm de Eck. Schiet ok, he hett noch nix to’n Freten kregen. Dat mutt nu gau noch regelt warrn, ehr dat Speel so richtig in de Gang is. Dor gifft dat wat ganz Feins: „World Cup Dinner“ för Stuventigers. Is dat nich wunnerbor? De Kater lickt sik al üm den Boort. He hett al lang markt, dat sien Lüüd in’n Ogenblick en beten mall in’n Kopp sünd. De Fan strakelt em gau mal över den Kopp un versprickt em: „In en poor Daag is allens vörbi, denn hest du Roh för de nächsten veer Johr!“ Dankbor luert he na em hooch. Man denn maakt he sik doch gau över dat lecker Football-Freten her. Beter is beter, ehr dat villicht in de Halftiet noch een wat afhebben will. Kann ja angahn, dat de Chips ut de swatt-root-gollen Tüüt denn all sünd!