Johanna Kastendieck "Football-WM 2014"

In en poor Daag schall dat ja nu los gahn, Football-Weltmeisterschaft. Un dor lees ik doch annerletzt in’t Blatt: Die ganze Welt bei dir zu Gast. Ik heff eerstmal de Ogen toknepen un dat noch mal leest. De hele Welt bi mi to Gast? Woso kümmt de hele Welt to mi op Besöök? Ik heff de doch gor nich inlaadt! Nee, nee, leve Lüüd, so geiht dat nich! Eerstens müch ik doch vörher mal fraagt warrn, wat jichenseen bi mi op Besöök kamen dörv, un twetens will ik mi de Lüüd, de bi mi to Gast sünd, doch sülvst utsöken.

32 Natschonen, un de all bi mi in’t Huus? Sowiet kümmt dat noch un de trampelt in de Wahnstuuv över mien nee’en Flokati. För die Greken mag dat ja noch sowat as en Heimatgeföhl ween. Aver maakt de överhaupt bi de WM mit? Nu heff ik eerstmal op den Speelplaan keken, de mien Mann blangen den Fernseher fastbackt hett. Ja, de Greken sünd dorbi. Aver wenn de bi mi in de Stuuv sitt, wüllt se seker en Ouzo oder villicht ok twee drinken. Goot, dormit kann ik ja noch denen. Aver wenn ik so op den Plaan kiek, wat maak ik mit Lüüd ut Elfenbeinküste, Ghana, Nigeria oder Süüdkorea un denn noch so anner Exoten? Ik heff doch meist keen Ahnung vun de ehr Kultur un wat de so eten un drinken doot. Frankriek, Holland, Schweiz un Italien, de kennt man ja. Dor weern wi ja al mal in Urlaub un sünd ok nich verhungert. För de Amerikaners mutt ik denn woll en poor Paketen Kaugummi vun Aldi halen un wenn wat över blifft, köönt mien Enkeljungs de kauen.

Aver wat is egens mit de Düütschen? Ik heff noch keen eenzigen Fan-Artikel un wenn ik mi nich ranholl, sünd de all utverköfft. Op’n Grabbeldisch bi KIK seeg dat güstern al heel mau ut. Na, Woolworth gifft dat ja ok noch. Ha, ik weet, in uns Garaasch liggt noch en poor lütte Düütschlandfahnen vun de letzte Europa-Meisterschaft, wenn de Müüs ehr nich al tweibeten hebbt.

Un denn funn ik noch en Artikel, wo instunn, dat de Tokiekers nu ok na Klock 10 an’n Avend bi dat Public Viewing Larm maken dröfft, blots in de Privathüüs nich – as wenn mien Navers bi jümehr Grillfesten dor al mal an dacht harrn!

Un dat ganze WM-Spektakel duert goot veer Weken. Dat holl ik nich ut. Ik neih ut! In uns Kino gifft dat en „Sonderprogramm“ as se dat nöömt. Klassiker as „Dr. Schiwago“, „Rocky Horror Picture Show“, „Message in a Bottle“, wo een so richtig bi hulen kann, ahn sik to schamen. Dor gah ik hen un nehm mi en groot Paket Taschendöker mit. En poor laat ik aver ok tohuus: Schull Düütschland över de eerste Runn nich rutkamen, denn hett mien Mann ok wat, mit dat he sik de Tranen afwischen kann.

Aver een Saak weet ik nu al wiss: ik stell de Huusdöörpingel af! Dat mien Mann eerst gor nich op de Idee kümmt, de hele Welt rintolaten. Schall mi mal verlangen!