Sporen in'n Snee - Stremel 23

To'n Luustern eenfach op den Knoop klicken

„Ik dreih Janssen dat Gnick üm! Woso hett he mi dat nich vertellt? Wat is di dat denn för en Kolleeg?” Dat Hanna Martini de olen Biller in ehr Fotoalbum so in Brass bringen wöörn, dor harr Levke nich mit rekent. „Dat hebbt Se nich wüsst, dat Johan ok mit to de Clique tohöört hett?” – „Wat schull ik woll? Mi vertellt hier ja nüms wat.”

Se segen op de Biller woll düchtig wat jünger ut, aver to kennen weern se meist all noch: Johan, Malte, Günter Quast, Willy Wischhusen ... egentlich all, de Hanna bi düssen Fall al mal vör de Fööt lopen weern.

„Noch en Kaffe?” – „Danke, nee.” Bilütten kreeg Hanna Martini sik wedder in. „Denn kennt Se jüm wiss ok al all siet Kinnertieden, Fro Brodersen?” – „Ja, kloor. As Malte sien Süster weer ik so’n Oort Maskottchen för jüm. Aver dat heff ik to de Tiet natürlich noch nich so sehn.” – „Un, äh ...”, Hanna keem dat en beten gediegen vör, so’n Fraag bi’n Klöönsnack an’n Kaffedisch to stellen. Dorüm stünn se op un güng an dat Bökerregaal, as wenn dor villicht en Book bi weer, wat ehr interesseren kunn. „Un troot Se een vun jüm en Moord to?” Levke anter veel to gau: „Dor stickt een ja nich binnen, nich!” In Hannas Ohren weer dat en düütlich „Ja”. „Also Willy Wischhusen egentlich nich. Dat is en Hampelmann un Brascher. He puupt jümmers mal rüm gegen Utlänners, aver dat he düsse Bulgarin ümbröcht hett. Nee. Nich wenn he nüchtern is.” – „Is he dat denn mal?” – „Dat fraagt Se beter sien Fro Grete.”

Op eenmal schoot Hanna Martini dör den Kopp, dat se villicht jüst en groten Fehler maken dee. Levke Brodersen weer de Süster vun een vun ehr twee wichtigsten Verdächtigen un harr ehr her beden. Villicht wull se ehr ja gor nix vertellen, man sülvst wat hören. Bloot is dicker as Saft. Un dat op ehr schaten worrn weer, dor geev dat ok blots een eenzigsten Tügen för: Levke sülvst. Wat, wenn …?

Levke weer nu ok opstahn un güng neger an de Kommissarin ran. „Villicht stickt dor ja nich blots een achter.“ – „Aha?“ – „Wenn de nu all ünner een Deek steekt?“ Wull Levke ehr aflenken? „Denn fangt jichenswenn een vun jüm an to plappern.“ – „Glööv ik nich.“ – „Woso nich?“ – „Dor hett doch een den annern in de Hand.“ – „Denn weet Se mehr as ik.“ Dat „Na ja …“ vun Levke höör sik nich so an, as wenn se wat vertellen wull.

Johan Janssen harr sik bi Malte Brodersen insluten laten. Malte leeg op de Britsch, Johan lehn sik an de Döör. „Un, Malte, wo geiht’t?“ – „Sühst ja!“ – „Wullt mi wat vertellen?“ – „Nee. Un du?“ – „Nee. Dörv ik nich.“ Malte lach op, as harr Johan jüst en goden Witz vertellt.

Hanna Martini weer in’t Bökerregaal dat Fack wiesworrn, wo Levke ehr egen Böker stünnen. „Is al en schöne Reeg.“ – „Ja.“ – „‚De Dode in’n Düvelsdiek‘, schönen Titel.“ – „Nich vun mi. De Titels maakt de Verlag. Köönt de beter. Meent se tominnst.“ – „Wenn ik nu all düsse Krimis dörlesen dee, wöör ik denn villicht en Motiv finnen?“ –  „Ja. Kloor. Sünd ja Krimis.“ – „Nee, ik meen, för dat, wat nu hier passeert is?“ Levke müss lachen. „Glöövt Se, de Lüüd hier speelt mien Krimis na?“ – „Nee, dat wiss nich. Aver villicht hebbt se ja mal Motive ut ehr egen Vergangenheit oder de vun Malte un sien Clique verarbeidt. Se hebbt doch seggt, dor hett een den

annern in de Hand.“ – „Nee, nee, söökt Se dat Motiv man lever hüüt. Villicht weern in de Nacht ja noch mehr Lüüd ünnerwegens? Hebbt villicht na Sophia söcht. Weern bang, dat wat rutkümmt?“ – „Un dat dode Wildswien? Un dat op Se schaten worrn is?“ – „Is villicht wat ut’t Roder lopen. Un wenn denn noch Spriet in’t Spill weer. Womööglich hett mi so’n Suupkopp in’n Düüstern mit Sophia verwesselt.“ – „Oder Drogen. Se sünd bang, dat weer ehr Broder, oder?“ – „Dor segg ik nix to.“

Johan Janssen weer nu bi Günter Quast in’t Lock. „Du musst mi hier ruthalen, Johan! Du musst mi hier ruthalen, bitte!“ „Dor kannst du blots alleen för sorgen, Günni. Deit mi leed.“

Stremel23

Text daalladen un drucken

Stremel 23

 

Peter Nissen

Peter Nissen

Peter Nissen (* 1957 in Borlum, Nordfreesland) is na’t Abitur na Kiel studeren gahn (Engelsch, Philosophie, Freesch). Vun 1987 bet 1994 weer he Dramaturg an’t Ohnsorg-Theater in Hamborg. Siet denn verdeent he sien Geld tohoop mit Hartmut Cyriacks in jümehr Textmanufaktur in Hamborg-Ottensen. Se schrievt un översett för Theaters, Radio, Fernsehn un Böker. Peter Nissen is twete Vörsitter vun den Verein Nordfriesisches Institut un wahnt in Borlum un Bargteheide. (Rechte am Bild: Werner Struss)