Wiehnachts-Traditschoon

As ik 1985 den plattdüütschen Quickborn-Verlag övernahmen heff, geev dat en ganzen Barg Böker vun Rudl Kinau in dat Programm. Sien Weetfru Maria hett noch op Finkwarder an den Neßdiek wahnt un se harr an`n 23. Dezember Geboortsdag. Vun`t eerste Johr an bün ik över vele Johren an düssen Dag na Finkwarder fohrt un heff ehr en Blomenstruuß bröcht. Wi hebbt en Schuur tosamen seten, hebbt snackt, vun ole Tieden un vun dat, wat rundümto passeert, un oplest hebbt wi uns schöne Wiehnachten wünscht. Ik kreeg jümmers en sülvstdreihte Immwasskers in de Hand drückt, bün na Huus fohrt, un denn kunn dat för mien Fru un mi Wiehnachten warrn. Dat weer so uns Traditschoon un dat hebbt wi so maakt, bit Maria Kinau storven is. Un jeedeen Johr, wenn dat op Wiehnachten to geiht, mutt ik dor an denken, un so leevt düsse Traditschoon in mien Kopp wieder.

 

Peer-Marten Scheller

hett dat Leit bi den Quickborn-Verlag. He is de Spreker för den Plattdüütschen Root för Hamborg un Liddmaat in den Bunnsraat för Nedderdüütsch.