Sünnerklaas

Kiek an, wat is de Himmel so root!
Dat sünd de Engels, de backt dat Broot.
De backt den Wiehnachtsmann sien Stuten
för all de lütten Leckersnuten.
Nu flink de Tellers ünner't Bett,
un leggt jo hen un weest recht nett!
De Sünnerklaas steiht vör de Döör;
de Wiehnachtsmann, de schickt em her.
Wat de Engels hebbt backt, dat schüllt ji prober'n,
un smeckt dat goot, so höört se dat geern,
un de Wiehnachtsmann smuustert: „Na, backt man mehr!“
Och, wenn’t doch man eerst Wiehnachten weer!

(Nach: Johann Beyer)

Düt Gedicht höört för mi to de Wiehnachtstiet to, wieldat mien Vadder mi dat jümmer opseggt hett, as ik noch en lütt Deern weer. He weer ok de, de mi de Leevde to Plattdüütsch bibröcht hett. He is al vör twintig Johr storven, man nu vertell ik dat Gedicht al lange Johren miene Kinner. So hebbt se wat vun den Opa, den se nich mehr kennenliehrt hebbt.

 

 

 

 

Ilka Brüggemann

is tostännig för dat Plattdüütsch-Programm bi NDR 1 Niedersachsen, ok bi "Hör mal’n beten to" is se mit bi.