De swatte Kachelaven

In de Kinnertiet stünn de swatte Kachelaven in uns Stuuv in’t Achterfack un reck mit de runnen Fööt meist bet ünner de Deck. To Wiehnachten kunnen wi as Kinner dor goot achter oder ok ünner schulen, wenn de Wiehnachtsmann denn kamen schull.

Nu steiht de ole Aven – över 150 Johr oolt – as en Smuckstück an de Flettwand tomerrn op de Deel. Jüst in de Adventstiet fangt dat Dagwark jedeen Morgen mit dat Inböten an. Wenn dat koolt, natt oder griesegrau is, hölpt de swatte Kachelaven dor över weg. „Mal even mit’n Puckel an den Aven krepen“, heet dat denn un bi dat Töven op Wiehnachten un op dat, wat kummt, kriggt een tominnst de rechte Warms.

 

Hans-Hinrich-Kahrs

is Schoolmester, he is in Neddersassen een vun de, de de Lehrerfortbildung un dat Berader-Nettwark in Gang bröcht hebbt. Höörspelen un Sketche hett he schreven un he kümmert sik üm Theaterspelen op Platt för junge Lüüd.