Wiehnachtsmann, du olle Krœt, bring mi Äppel un Peppernœt!
Peppernœt sünd all? – Wiehnachtsmann büst mall?

Nich jümmers wier de Wiehnachtsbäder ('Weihnachtsmannbitten/ ~gebete') bi den Adressaten gaud ankåmen. Af un an har hei sik dor bäten füünsch uprägt œwer. Man as hei denn ‘n por Peppernœt vun de Kinner kreech, leet hei sik begäuschen. Wenn ein uk dat best Rezept vun Peppernœt för sik behollen sall, will ik Juch min Rezept liekers utklœtern - as lütt Wiehnachtsgåf.

Wat ein bruken deit:

  • 1 kg Mähl
  • ½ Glas Wåder
  • ½ kg Zucker
  • 20 dkg Honnig
  • 2 Eier
  • lütt bäten Schwienschmult
  • Krut: Kaneil, Krüdnelk, Schål vun’e Zitron orrer al vermengeliert Krut för Peppernœt
  • taun Upgåhn:  2 lürlütt Löpel Soda bic, 1 lürlütt Löpel Hürschhuurnsult

An den Dag dorvör:

  •  Wåder, Honnig un Zucker upwarmen;
  • Krut, Eier un Schmult vermengelieren;
  • Mähl un Middel taun Upgåhn tauierst ünnerrühren un achterher knäden

Wohrschau!

  • Dat heile Mähl möt upnåhmen warden!
  • De Deich möt taumindest 24 Stunnen tau Rauh kåmen.
  • In‘n Käuhlschapp kann de Deich lang liggen bliewen.

Deich dünn utwalken un vör’t Backen mit Ei œwerstrieken. Ein kann de Nœt uk mit Mannelkaarns schmuck måken.

"Gauden Appetit" wünscht Birte Arendt.

Se is Germanistin an de Universität Giepswold. Se hett dat Leit vun dat „Kompetenzzentrums für Niederdeutschdidaktik“.