Dat Wiehnachtslicht

„Dat Wiehnachtslicht kannst an't Enn vun den November al kamen sehn“, hett fröher mien Vadder seggt un mi üm de Fuddertiet na buten schickt, dat to söken. Jümmersto hebb ik dacht, dat is dat Licht, wat vun Hamborg röverschient. Is dat aver nich, denn dat Wiehnachtslicht kannst du överall wies warrn. Üm un bi den 24. fangt dat an. De Luft warrt s'avends still un dörsichtig un so langsam kummt dat Licht an. Wieldat de Heven apen steiht. De Viecher buten, de weet dat. De hollt ok still. Na Wiehnachten is dat richtig dor, op de Eer, aver denn warrt dat ja sounso al wedder heller. Un denn kann jeedeen Dööskopp dor wat vun marken.

Birgit Lemmermann

Se is Schoolmestersche för Kunst, Sport, Warken an dat Aue-Geest-Gymnasium Harsefeld, man se is ok en Schrieversche, de en Reeg plattdüütsche Priesen kregen hett, se illustreert Böker un arbeidt as free Huusfro.