Rita Schloendorff

Quelle Weser-Kurier/Bremer Nachrichten. Bildrechte: Christian Kosak

Se hett Georg Droste sien Ottjen Alldag Böker vun Platt na Hooch översett. Op't leefst is se to Foot ünnerwegens: Se wannert geern un siet en poor Johren pilgerwannert se sogor.

1943 ist Rita Schloendorff in Walle bi Veern an de Aller op de Welt kamen. Groot worrn is se op en lütten Hoff un dor worr Platt snackt. Siet 1966 leevt se nu al in Bremen.

Wat se geern mag, dat is de Gegend, in de se tohuus is, dat sünd de Minschen, de dor wahnt, un dat is Platt, ehr Kinnerspraak. Söcht hett se na en Projekt , bi dat se dat allens wedderfinnt. Funnen hett se Georg Droste sien Ottjen Alldag-Böker. Schreven hett he de vör goot hunnert Johr op Platt. To köpen geev dat de al lang nich mehr. Man gefullen hebbt Rita Schloendorff de dree Böker allerbest: Dor geiht dat üm de Minschen, de in Bremen un in't Düvelsmoor tohuus sünd, un üm dat, wat se beleevt. Rita Schloendorff meen: De Geschichten, de Droste so wunnerbor to Poppier bröcht hett, schöölt ok Lüüd lesen, de keen Platt köönt. Un se hett anfungen to översetten. Nu gifft dat de Böker wedder un een kann op Platt oder op Hoochdüütsch vun Ottjen lesen. Bi Droste is Rita Schloendorff bibleven: Opstunns översett se "Jann von'n Moor un anner Geschichten ut Stadt un Land". Un denn ... Ja, se hett noch de een oder anner Idee, wat se noch översetten kunn.

En Auto bruukt Rita Schloendorff egens nich: Se löppt to Foot. Woveel dusend Kilometer se al wannert is, weet se nich, man: keen Barg is ehr to hooch un keen Weg to wiet. Middewiel pilgerwannert se ok. En poor Maal is se al Stücken vun den Jakobsweg lopen. Denn hett se faststellt: Pilgerwannern kann ik ok hier in de Gegend. Un anner Lüüd hebbt dor wiss ok Freid an. Tohoop mit en Pastorin un ehren Mann stellt se eenmal den Maand en Pilgerwannertour op de Been. Dat güng al bet na Ossenbrügge, na Olschloo un na Cuxhoben. Op den Weg kiekt sik de Wannerslüüd Karken an, un de Pastorin vertellt wat. Man bi't Lopen swiegt se meisttiet still - villicht fallt Rita Schloendorff dor ja all de Saken in, de se noch översetten will? Denn schall se man noch düchtig wiederlopen!