Malte Battefeld

As Riemelmester Malde schrifft he Texten för De fofftig Penns. Opstunns schrifft he an sien Dokterarbeit in Belgien.

Du büst ja ut Bremen, man büst hier al en ganze Tiet lang nich mehr sehn worrn. Wo büst du? Wat maakst du?

Opstunns heff ik en Promotschoonssteed in Belgien, an de Universität vun Gent in Flandern. Dor bün ik siet üm un bi twee Johr togang mit mien Dokterarbeit in de Spraakwetenschop. Dat geiht üm Wortbildung in Düütsch, Nedderlandsch un Sweedsch – dat hett also nix mit Plattdüütsch to kriegen. Genauer: üm Komposita, also tohoopsett Wöör as Huus-döör, Groot-hannel, Höör-book un so wieder. Dat klingt nu villicht ’n beten dröög, man dat maakt würklich bannig veel Spaaß. Butendem bün ik dor ja ok üm – as Mudderspraakler (is dat ’n plattdüütsch Wort?) – Linguistik up Düütsch to ünnerichten.

Woneem hest du Platt lehrt?

Platt weer nich mien eerste Spraak, wieldat wi dat to Huus meist nich snackt hebbt, man ik harr – to’n Glück! – vun lütt op an veel Kuntakt mit Platt dörch verscheden Lüüd. Un denn harr ik ok noch de Bremen-Norder Plattkoryphäe Bernd de Reese as Schoolmester. In sien Plattkurs hebbt wi domals ok De fofftig Penns grünnt.

Wat is Platt för di?

Platt is en Spraak, de in Noorddüütschland noch jümmers wichtig is un di Togang gifft to de Levenswelt vun en Barg Lüüd. Un denn is dat en bannig schöne Spraak, in de ik mi geern utdrücken do, ünner annern in use Musik. Nich tolesd is dor de emotschonale Komponente – wenn ik Platt höör un mit Lüüd snacken kann, denn föhl ik mi to Huus, egal woneem dat is. Kommunikativ is dat avers för mi sülven egentlich Luxus un mehr Grootmudderspraak as Mudderspraak. As Linguist helpt liekers jede Spraak to verstahn, woans dat grote Wunner Spraak – an sik – funkschoneern deit.

Wat hest du blangen Musik noch mit Platt to doon? Leest du plattdüütsche Böker? Geihst du na't Theater? Snackst du mit anner Lüüd Platt?

Ja, allens, wenn dat dor to kummt. Blangen de Fachliteratur heff ik in’n Momang leider nich so veel Tiet to’t Lesen as fröher, man twüschen de Böker, de ik lesen do, is ok af un an en plattdüütsch Book. Faken sünd dat denn de Klassikers, annerletzt heff ik endlich mal „Ottjen Alldag“ vun Georg Droste in de Hand kregen. Plattdüütsch Theater gifft dat in Belgien natüürlich nich un so veel, un Lüüd to’t Platt snacken ok nich... Mag hapen, dat dat nich inrüsten deit!

Gifft dat noch anner plattdüütsche Musikgruppen, de du di geern anhöörst?

Veel sünd dat nich. Aver ik höör mi jümmers mal an, wat anner Lüüd för plattdüütsch Musik maken doot, dat interesseert mi ja ok. To’n Bispill, wat bi düssen Plattsounds-Wettbewerb passeren deit. Echten Fan bün ik avers vun Otto Groote! Veel vun dat, wat he un sien Grupp maakt hebbt, finn ik richtig klasse. Un „Mit den Regen“ vun Jan Graf is en CD, de ik jümmer mal wedder höör.

Wat för en Oort Musik maakt De fofftig Penns?

Wi maakt plattdüütschen Rap, faken in Kombinatschoon mit elektroonsch Musik, mennichmal geiht dat avers ok in Richtung Pop.

Wat för en Leed vun De fofftig Penns magst du op leevst, un woso?

De egen Musik hett een jichtenswann so faken höört, dat een dat meist nich hören kann. Man wi hebbt jüst en nee’e Single rutbröcht, „Dascha ’n Ding“ heet de. Dat is noch frischen Kraam, dat kann ik noch geneten!

Wat maakt De fofftig Penns opstunns?

Wi maakt us Ding as jümmers. De Band is jümmers en Hobby ween, wi hebbt all anner Jobs, man en poor Mol in’t Johr kaamt wi tohoop un maakt nee’e Musik oder geevt Kunzerten. Un dat schall ok so blieven. Mit dat Modell wüllt wi jichtenswann geern de plattdüütschen Rolling Stones warrn.

Wat plaant ji för 2016?

Wenn dat slumpt, suurt dor in’n Sommer en poor feine Uptritten rut. Un denn gifft dat noch Ideen för nee’e Musik, aver dat is noch to fröh üm dor över to snacken. Wi harrn siet „Löppt“ egentlich keen richtigen Hit mehr, dat is mal wedder Tiet!

Du büst bi De fofftig Penns Riemelmester Malde. Woneem riemelst du? In't Bett, bi't Radfohren oder an den Reekner?

Woans de Texten entstaht, kann ik nich seggen. Mal so, mal so. Männichmal denk ik över wat na, un denn wüllt bestimmte Wöör nich mehr ut’n Kopp rut. Dat sammel ik denn un na en poor Weken heff ik wedder noog Material vör en Song.

Sünd de annern jümmers inverstahn mit dien Texten, oder harrn Ji Jo al mal in de Klatten?

Ik bün ja nich mehr de eenzigste, de Texten schrieven deit, Torben maakt dor intwüschen ok mit. Tominnst de Hälft vun de Texten vun de letzte CD „Een vun De fofftig Penns“ hett Torben schreven. Vunwegen de Texten harrn wi us noch nienich in de Klatten. Qualität steiht för uns beide bavenan, un dat geiht denn egentlich jümmers kloor.

Ji gaht ja in de Texten kreativ mit Spraak üm, speelt mit Spraak, vermengeleert ünnerscheedliche Spraken. Kannst du dor wat to seggen?

Nu ja, dat maakt annern – düütsche – Rappers ja ok. Engelsche oder arabische Slagwöör, de in de Rapszene begäng sünd, de bruukt wi ok af un an. Wi nehmt denn natüürlich ok noch hoochdüütschen Slang mit rin.

Wat för nee'e Wöör sünd dor to'n Bispeel al bi rutsuert?

Up „Dascha ’n Ding“ snack ik to’n Bispill över Bremen-Norder „Skreets“ un nich vun „Straten“. Oder dorvun, dat ik 100.000 „Bars spitten“ do, also „Takten rappen“. Wokeen düütschen Rap en beten kennt, man keen Platt versteiht, de versteiht denn tominnst düsse Wöör.

Woans fierst du Wiehnachten? Singt Ji Wiehnachtsleder? Kommodig mit mien Öllern un Broder to Huus in Ve(g)esack. Un ja, wi maakt alltohoop Musik an Wiehnachten, man eenfach, wiel dat Spaaß maakt, nich ut religiöse Grünnen.