Lüneplatt

Siet 2012 gifft dat Lüneplatt e.V. nu al: En Vereen, de wat doon will för Platt in de Hansestadt un in den Landkreis Lümborg. De Minschen in de Region schüllt marken: Platt speelt hier bi uns en Rull.

De Lüüd in den Vereen wüllt en Nettwark för Platt in de Region opboen. Dat gifft en Barg Minschen, de sik al för Platt insett un anner, de geern wat maken wüllt - Lüneplatt bringt jüm tohoop. De Vereen maakt jüm Moot un gifft Stütt bi plattdüütsche Projekten.

För Kinner un junge Lüüd stellt Lüneplatt ok wat op de Been: Siet 2013 warrt in de Wiehnachtstiet Märken ut Lümborg op den Wiehnachtsmarkt ok op Platt vertellt. Un vun düsse Märken hett de Vereen en CD maakt: En Höörbook mit plattdüütsche un hoochdüütsche Märken. Dat Geld, dat bi den Verkoop vun de CD rinkümmt, bruukt de Vereen wedder för anner plattdüütsche Projekten in de Region.

De mehr vun Lüneplatt lesen will, kann dat op de Homepage doon. Un mitmaken bi den Vereen kaan jeedeen - dat jüngste Liddmaat is man jüst 5 Johr oolt!

www.lueneplatt.de.