Karen Nehlsen

In dat lütte Dörp Sollwitt, ganz baven in Sleswig-Holsteen, is Karen Nehlsen 1968 op de Welt kamen un dor ok groot worrn. Bet se na School henkeem, hett se blots Platt snackt.

För en Tietlang hett ehr Mudder versöcht, ehr Hoochdüütsch bitopulen: Een Dag de Week schull in de Familie blots Hooch snackt warrn. Man dor wull Karen Nehlsen nix vun afweten.

In de School harr denn dat Hoochdüütsche gau de Bavenhand un Platt hett blots bi't Theaterspelen oder bi "Schölers leest Platt" en Rull speelt. Man as se sik as Au Pair op den Weg na Schweden maakt hett, hett ehr Mudderspraak ehr holpen: Vun Sweedsch wuss se nich veel af. Se hett eenfach Platt snackt - güng ok allerbest. Karen Nehlsen, de Schoolmestersche worrn is, hett al veel vun de Welt sehn, un ehr Familienspraak Platt is för ehr jümmers ehr Tohuus.

2011 güng för Karen Nehlsen en nee'e Stremel mit Platt los: Se hett den Mann kennenlehrt, mit den se nu verheiraadt is. Vun Anfang an hett se blots Platt mit em snackt, man nich blots dat: De beiden hebbt sik ok plattdüütsche Breven schreven. Egens kunn de Schoolmestersche gor nich op Platt schrieven, man nu wull se dat lehren un hett bi Seminoren vun den Sleswig-Holsteenschen Heimatbund mitmaakt.

Siet de Tiet schrifft Karen Nehlsen plattdüütsche Geschichten, se klütert mit Wöör un speelt mit Spraak. Na en langen Schooldag kümmt se bi't Schrieven to Roh. Un dat löppt goot: Bi Vertell doch mal 2015 is se in dat Book mit de besten 25 Geschichten rinkamen. 

As Karen Nehlsen fraagt worrn is, wat se an en plattdüütsch Schoolbook för Grundschölers mitarbeiden will, hett se foorts ja seggt. Engelsche Lehrböker harr de Schoolmestersche al mit utarbeidt, un nu en Book för den Plattdüütsch-Ünnerricht kloor to kriegen, dor harr se Lust to. "Opstunns löppt veel in't Land un hier heff ik de Schangs mittomaken un dor wat för to doon, dat Kinner Spaaß an't Plattdüütsch-Lehren hebbt", verkloort Karen Nehlsen. Un dat Schoolbook is al trecht: Na de Sommerferien warrt de Lütten in de eerste Klass mit Emma un Paul Platt lehren.