Dirk Böhling

De Mann kann nich still sitten, he mutt jümmers wat to doon hebben - op't leefst fief Projekten to desülvige Tiet. Un meisttiets is dor tominnst ok een plattdüütsch Projekt bi.

En grote Rull speelt för Dirk Böhling dat Theater. Bi't Theaterspelen hett he Plattdüütsch lehrt. Dor harr he so veel Spaaß an, dat he seggt hett, he will nich blots op de Bühn stahn, nee, he will ok sülvst Stücken op de Bühn bringen. Un wenn he sik wat vörnimmt, denn maakt he dor ok wat vun: In Hamborg, Schwerin un Cuxhaben hett he al plattdüütsche Theaterstücken maakt.

Een Saak geiht bi Dirk Böhling nienich ut, un dat sünd Ideen för nee'e Projekten: Jüst hett he en Kinnerbook schreven, de Geschicht vun Pummel Plüüschmoors, en lütte Hummel, de de Welt kennenlehrt.

Veel Pläseer maakt Dirk Böhling allens, wat mit Musik to doon hett: Al lang dröömt he dorvun, mit Peter un de Wulf Kinner mit klassische Musik un mit Platt tohoop to bringen.

Sien nee'e Projekt hett ok mit Musik to doon un is villicht en beten snaaksch: Dirk Böhling hett sik överleggt, egens kunnen de Blues Brothers doch ok mal op Platt singen. Un wenn de Jungs op Platt singt un hier in'n Noorden leevt, denn sünd dat de Blues Bremers. Se hebbt Sünnbrillen op un Gummisteveln an un singt vun't Leev-Hebben un vun't Alleen-Ween.

Op Platt överdragen hebbt de Texten de Lüüd vun't INS un vun Sweet home Chicago foorts Ool Büttwarder maakt. Dat Översetten vun de Leedtexten weer nich so licht to: So veel snackt wi hier in'n Noorden vun Geföhlen ja egens gor nich, man in de Texten geiht dat meist üm nix anners. Düt Leed vun de Blues Brothers kennt wi all, un op Platt heet dat denn:

Ik, du, he, se – bruukt bi sik een
Ik, du, he, se – bruukt bi sik een för’t Hart
Bruukt een för’t Hart
Schasst mi anböten
Honnig as ’n Söten
Ik will di di di
Ik will di di di
Ik will di di di Fröh an’n Morgen
Ik will di di di Wenn’k vergah vör Smacht
Ik will di di di

De Lust hett, sik de Blues Bremers antohören, kann dat bi de Breminale, dat grote Kulturfest in Bremen, doon: An'n 17. Juli Klock 11 an' Avend in't Telt vun Bremen 1.