Birgit Lemmermann

Wöör, Klöör, Pinsel un Natur - veel mehr bruukt Birgit Lemmermann egens nich. Se schrifft Geschichten un Gedichten op Platt un ok an en Romaan hett se sik al waagt. To ehr Geschichten maalt se faken ok de Biller dorto.

Birgit Lemmermann ut Ahlerstedt-Klethen in Neddersassen is plattdüütsch groot worrn; Hoochdüütsch keem dor blangenbi to. Dag för Dag hett se Platt snackt, bet se to't Studeren un Arbeiden na Kassel gahn is. Se weer al en ganze Tiet weg vun Tohuus, dor is se mitmal wies worrn, wo dull ehr Plattdüütsch fehlen deit. Gau weer för ehr kloor: Se will wedder trüch na'n Noorden. Un dor is de Schoolmeestersche ok bleven.

Anfungen to schrieven hett se, as ehr Söhn lütt weer: Dat geev un geev eenfach kene goden plattdüütschen Kinnerböker, de se em vörlesen kunn. Dor is de lütte Boor Emil op de Welt kamen. Un nich blots ehr egen Söhn, nee ok anner Kinner harrn Freid an dat, wat Emil beleevt. "Woans geiht dat wieder mit Emil?", "Wat hett he as Kind maakt?" - dor müss Birgit Lemmermann en Antwoort op geven, un se hett wiedermaakt mit dat Schrieven för de Lütten.

Schrieven un Malen löppt för Birgit Lemmermann Hand in Hand. So kann vun dat, wat se in ehr free'e Tiet geern maakt, en Gesamtkunstwark warrn. Se schrifft Geschichten un Lyrik.

Plattdüütsche Romane sünd in de letzten Johren nich veel rutkamen; un Romane för junge Lüüd al lang nich. Man Birgit Lemmermann hett düsse Opgaav annahmen: Mit wat för Fragen hebbt junge Minschen to doon? Vör wat sünd se bang? Wo wüllt se hen in't Leven? - Dor hett de Schoolmeestersche op See över nadacht: Grote Stücken vun den Romaan "Ebbe un Hehn" hett se op en Segeltörn schreven.

Birgit Lemmermann is een vun de groten plattdüütschen Schrieverslüüd ut uns Tiet. Se is al mit en ganze Reeg Priesen uttekent worrn. De Texten vun ehr leest, kann marken: Dat Schrieven maakt ehr würklich Freid. Se schrifft vun de Minschen un vun de Natur. Un jümmers is dor en lütt beten Plie mit bi. Nee, all to eernsthaftig nimmt Birgit Lemmermann sik sülvst un de Welt nich.