01.02.2018

Noch bet Enn Februar: Wat för'n Dag

Vertell doch mal - düt Johr löppt de 30. Tuur vun den plattdüütschen Schrievwettstriet. Dat Motto dütmal: Wat för'n Dag. Also: En lütte Geschicht opschrieven un bet to'n 28. Februar henstüern na een vun de Lanns-Funkhüüs vun den NDR oder Radio Bremen.

De besten 26 Geschichten kaamt in en Book rin, de besten 5 warrt an'n 3. Juni op en Gala in't Ohnsorg-Theater vörstellt. Ok dütmal gifft dat wedder en Ü-18-Pries. Mitmaken dröfft hier blots junge Lüüd ünner 18.