28.11.2017

Mehr Platt in’t Radio? Mehr Dialekt?

Gifft dat mehr Platt in’t Radio to hören oder seggt dat blots de Lüüd ut de Funkhüüs? Speelt de Klang vun de Region villicht sogor en gröttere Rull as noch vör teihn Johr? Düssen Fragen hett dat Online-Magazin „Meinungsbarometer“ an Radio-Lüüd un Wetenschaftlers schickt. De Antwoorten sünd nu natolesen.

Egentlich schall dat üm „mehr Dialekt“ gahn. Un denn lannt se doch wedder bi Platt – ok wenn dat hier jüst nich üm den regionalen Klang geiht, dorför aver för en Spraak, de nu mal anners is as dat Hoochdüütsche.

För Stefan Frühbeif vun den Bayerischer Rundfunk drückt de Dialekt Authentizität un Sülvstbewusstsein ut, jüst as Trachten oder Volksdanz. Sebastian Kürschner vun de Uni Eichstätt/Ingolstadt wiest op Neegde un Heimat hen, de mit den Dialekt opropen warrt. Liekers meent Alfred Lameli vun dat Forschungszentrum „Deutscher Sprachatlas“ in Marborg nich, dat in Tokonft mehr Dialekt in’t Radio to hören is.

Dat Plattdüütsche hett dat in de noorddüütschen Medien nich jüst licht. De Programmleiter vun Bremen een, Berthold Brunsen, bringt de Regionalspraak tohoop mit Identität un Kultur. Un Volker Thormählen, Baas vun dat NDR-Lannsfunkhuus in Kiel, vertellt vun nee’e Formate as „Poetry Slam op Platt“, de ok junge Lüüd afhaalt. Andrea Kleen un Reinhard Goltz vun de Instituten för Düütsche un Nedderdüütsche Spraak hebbt jüst in en Projekt rutfunnen: Platt in’t Radio warrt nich mehr, man dat warrt fründlicher ankeken.

Dat is natolesen ünner:

meinungsbarometer.info/beitrag/Renaissance-des-Platt---Aber-nicht-im-Privatradio_2633.html