04.01.2016

Lesung im INS: Gah mi af – seggt Gerd Spiekermann

Vertellen kann he as man een: Vun sien Jungstiet in Braak an de Werser, vun sien Familie un vun snaaksche Lüüd. Gerd Spiekermann weer över 30 Johr bi den NDR in Hamborg för Plattdüütsch tostännig, sien Stimm kennt jeedeen vun „Hör mal en beten to“. In över teihn Böker kann een sien Geschichten nalesen.

Dat meiste leest he nich vör, nee: Gerd Spiekermann vertellt free rut, jüst so, as wörr he würklich vun sik sülvst vertellen. Man dor hett en Uul seten. Denn dat is ja de Kunst, dat sik dat so anhöört, as weer dat so un nich anners aflopen.

De Lesungen gifft dat eerst siet 2015 in dat Institut für nedderdüütsche Spraak. Bi de Schrieverslüüd, de bet nu leest hebbt, weern Birgit Lemmermann un Dirk Römmer de bekanntesten.

Den Anfang vun de Lees-Tiet 2016 maakt Gerd Spiekermann – an’n Deensdag, den 26. Januar. Los geiht dat Klock 7, in‘t Institut för nedderdüütsche Spraak, Bremen, Schnoor 41-43. De rin will, mütt dor nix för betahlen.