04.12.2017

En Baasfro för dat Plattdüütsche Zentrum

Gesa Retzlaff - so heet de nee'e Baas vun dat Plattdüütsche Zentrum in Leck. Dat is tostännig för Fragen rundüm Plattdüütsch in den Kinnergoorn un in de School in den Lannsdeel Schleswig. En Halvjohrs Tiet is Ingwer Oldsen al ut dat Amt rut, nu schall Gesa Retzlaff in'n Februar dat Stüer in de Hand nehmen.

As Schauspelerin an de Flensborger Bühn hett se ehr Talent wiest, se hett mit veel Spaaß Leven rinbröcht in "De junge Lüüd ut Löwenstedt" - en Fro, de vull Ideen stickt. Bet nu weer se Schoolmestersche an de Grund- un Gemeenschaftsschool in Mildstedt bi Husum.