27.09.2018

20. Oktober: Premiere för Ritter Trenk

Dat warrt en groot Vergnögen in't Abaton-Kino in Hamborg: An'n 20. Oktober versammelt sik Kinner un junge Lüüd, un vele warrt woll ok Oma, Opa, Mama, Papa, Onkel, Tant, Broder oder Süster mitbringen. Se all wüllt sik ankieken, wat rutkamen is bi den Versöök, Ritter Trenk Plattdüütsch bitobringen.

Ritter Trenk, dat is al vele Johren een vun de groten Kinner-Trickfilm-Helden. Nu hebbt de Figuren plattdüütsche Stimmen kregen. Achteran löppt de Film dör en ganze Reeg vun Kinos överall in Noorddüütschland. För de Scholen gifft dat aver ok en DVD.