06.02.2018

11. Februar op KiKa: Daria seggt "Plattdüütsch is cool"

Sünndag, den 11. Februar, Klock Viddel na veer löppt op Kika „Schau in meine Welt!“ - dütmal mit en Film över Daria. De is 13 Johr oolt un för ehr gellt: Plattdüütsch is cool.

„Ik bruuk Bloot“ - op de Bühn speelt Daria Leddin en Vampiroma. Ehr Platt hett se vun Oma lehrt. As se noch ganz lütt weer, hett Oma al jümmers Platt mit ehr snackt. Un dor, woneem se to Huus is, in Hollenseth bi Staad, kann een ganz normaal un jeden Dag Platt snacken. 

In den Film nimmt Daria de Tokiekers mit in ehr Leven. Op de Bühn mit de Theatergrupp „De Wellenbreker“. Denn speelt se Football un öövt scheten mit dat Luftgewehr. Un wenn se Tiet hett maakt se för de DLRG en Kurs in Eerste-Hölp oder fohrt mit Oma to'n Waterski.

Daria - en heel un deel normale Deern. Un Platt höört bi ehr mit dorto.