08.07.2020

Woneem Wöör wohr warrt

Oostfreesland is en Land vun Schrieverslüüd. Dat Book versammelt Gedichten un Vertellen vun 10 Froens un 8 Mannslüüd, de bi den Schrieverkring Weser-Eems mitmaakt. Un jeedeen hett op sien oder ehr egen Oort wat to vertellen: Märken, Fabeln, Sagen, Lögengeschichten, Fantasievertellen.

Dat gifft en Traditschoon in den plattdüütschen Noordwesten, dat dor veel snaakschen Kraam vertellt warrt, mit Mystik un dat twete Gesicht. Hier gifft dat weniger to lesen vun den Alldag un all de nixhaftigen Geschichten, de dat Leven Dag för Dag so schrieven deit. Dor mütt sik de Lesers op inlaten. Man wenn se dat doot, steiht en heel un deel afsünnerliche Literaturlandschaft vör jem op. Un mit de Tiet kaamt Lesers ut anner Gegenden wiss ok mit dat Oostfresen-Platt trecht.

Dat Book hett en fasten Deckel, de Schrift is goot to lesen. As Ruutgever trechtklütert hett allens Carl-Heinz Dirks. Mag ween un he harr noch en lütt beten to de Schrieverslüüd seggen schullt.

 

Carl-Heinz-Dirks (Hrsg.): Waar Woorden wahr worden. Anthologie van de Schrieverkring Weser-Eems. Emden : Diesel 2020, 175 S.

ISBN 978-3-934835-40-5